Kezekten tys Hİİ sesıada máslıhat depýtattary Almaty qalasynyń 2024-2026 jyldarǵa arnalǵan búdjetin qoldap, bekitti. Sesıa jumysyna megapolıs basshysy Erbolat Dosaev, depýtattar jáne jergilikti atqarýshy organdardyń basshylary qatysty.
Osylaısha, Almatynyń 2024 jylǵa arnalǵan búdjeti 1 trln 624 mlrd teńgeni qurady. Onyń ishinde aǵymdaǵy shyǵystarǵa búdjettiń 1 trln 110 mlrd teńge (68,4%) baǵyttalatyn bolady. Qalanyń damý búdjeti 233 mlrd teńgeni (14,4%) quraıdy.
Qala ákimi Erbolat Dosaevtyń aıtýynsha, qala búdjeti áleýmettik baǵytty saqtap, birinshi kezekte Almatynyń orta merzimdi damýynyń negizgi baǵyttary boıynsha QR Prezıdenti Qasym-Jomart Toqaevtyń tapsyrmalaryn iske asyrýǵa baǵdarlanǵan. Áleýmettik ınfraqurylymdy damytýǵa jáne jańǵyrtýǵa, bilim berý jáne densaýlyq saqtaý qyzmetteriniń qoljetimdiligi men sapasyn arttyrýǵa erekshe nazar aýdarylatyn bolady.
«Eger 2022 jyldyń aıaǵynda áleýmettik salanyń búdjeti 506,4 mlrd teńgeni qurasa, 2023 jyly ol 160 mlrd teńgege – aǵymdaǵy jyldyń qarasha aıynda 665 mlrd teńgege deıin ósti. 2024 jyly áleýmettik salaǵa 726 mlrd teńge bólý josparlanýda, bul Almaty qalasynyń búdjet shyǵystarynyń 44,7%–yn quraıdy», - dedi Erbolat Dosaev.
Sonymen qatar, 2023 jyl «Almaty qalasyn damytýdyń 2025 jylǵa deıingi baǵdarlamasyn jáne 2030 jylǵa deıingi orta merzimdi perspektıvalaryn» iske asyrýdyń alǵashqy jyly boldy. Máselen, osy jyldyń 10 aıynda ekonomıkanyń serpindi ósýi qamtamasyz etildi, qysqa merzimdi ekonomıkalyq ındıkator 13,1% - ǵa ósti (QR boıynsha 1 oryn). Qala ekonomıkasyn damytýdaǵy oń dınamıka búdjet kiristeriniń 34,5%-ǵa – 4,9 trln teńgege deıin ósýin qamtamasyz etti, bul rette respýblıkalyq búdjetke ósim – 35,4%, al jergilikti búdjetke 32% qurady.
Budan bólek, depýtattar 1986 jylǵy jeltoqsan oqıǵasyna qatysýshylarǵa birjolǵy tólemdi 150 myńnan 250 myń teńgege deıin ulǵaıtýǵa daýys berdi. Osylaısha, qalada turatyn 670 «jeltoqsandyqtarǵa» bıyl Táýelsizdik kúnine oraı tólemder uıymdastyrylady.
Sesıa qorytyndysy boıynsha Almaty qalasy Din isteri basqarmasynyń qyzmetkerleri úshin eńbek jaǵdaılaryn jaqsartý, atap aıtqanda, laýazymdyq jalaqyny eki esege arttyratyn yntalandyrýshy ústemeaqylar ornatý bekitildi. Qyzmetkerlerdiń qazirgi eńbekaqysy 105 209 teńgeden 152 681 teńgege deıin (salyq shegerilgenge deıin) qurady.