Belsendi top jastarǵa birden baıyp ketý múmkin emestigin aıtty
Qarjylyq saýattylyqty arttyraıyq! Almatyda prokýrorlar, qarjygerler jáne qoǵam belsendileri birigip stýdentterge osyndaı taqyrypta dáris oqydy, dep habarlaıdy Almaty-akshamy.kz Almaty.tv-ge silteme jasap.
Óıtkeni sońǵy ýaqytta aılakerlerdiń qurǵan qaqpanyna jastar turmaq, aqyl toqtatqan eresekter de túsip jatyr. Máselen, bıyl bir ǵana Bostandyq aýdanynda alaıaqtyq baby boıynsha 1300-ge jýyq qylmystyq is qozǵalypty. Onyń 215 ic - ınternet arqyly aldanǵandar.
«Bostandyq aýdanynda ornalasqan JOO-ny aralap shyǵamyz. Biz jastarǵa alaıaqtardyń qurbany bolmas úshin ne isteý kerektigin túsindirip jatyrmyz. Aldaıtyndardyń jańa ádisterinen de habardar ettik. Stýdentter elimizdiń túkpir-túkpirinen keledi ǵoı, kóbi bile bermeıdi, sol úshin zań buzýshylyqqa jol bermeý úshin túsindirme jumysyn júrgizdik», – dedi Bostandyq aýdany prokýrorynyń orynbasary Nurjan Qazantaev.
Belsendi top jastarǵa birden baıyp ketý múmkin emestigin aıtty. Olar tek bilim men eńbektiń arqasynda ǵana jetistikke jetýge bolatynyn túsindirdi. Sondyqtan qarjy pıramıdalary, mıkrokredıttik uıymdarǵa jolamaýǵa shaqyrdy. Al bastaryna is tússe ony jaqyndaryna aıtyp, aqyldasý qajet.
«Balaǵa ata-anadan jaqyn adam joq. Qandaı máselege tap bolsa da, olar et jaqyndarymen bólise bilýleri qajet. Alaıaqtar bir orynda turmaıdy. Kún saıyn arbaýdyń san túrin oılastyryp jatyr. Ol úshin jastar saýatty bolý kerek. Bul óz bolashaqtary úshin asa kerek», – dedi «İsker ana» áleýmettik jobasynyń jetekshisi Bıbinur Sherálıeva.