QR Ulttyq akademıalyq kitaphanasynda Máshhúr Júsip Kópeıulynyń 165 jyldyǵyna arnalǵan «dóńgelek ústel» jáne «Máshhúr Júsiptiń tylsym álemi» atty kitaptyń tusaýkeseri ótti.
Jıynǵa Máshhúr Júsiptiń urpaqtary, QR Parlamentiniń Senat jáne Májilis depýtattary — Altynbek Nuhuly, Nurtóre Júsip, Janarbek Áshimjan, Amanjol Áltaev, Ádil Ahmetov jáne Ǵarıfolla Esim, Darhan Myńbaı, Qaırat Ábýseıitov, Dıhan Hamzabekuly syndy memleket jáne qoǵam qaıratkerleri, sondaı-aq zıaly qaýym ókilderi, tarıhshylar, máshhúrtanýshylar, BAQ basshylary qatysty. Pikir almasý kezinde uly tulǵanyń qazaq tarıhyndaǵy jáne rýhanıatyndaǵy orny, jas urpaqqa murasyn jetkizý joldary, qoǵamda nasıhattaý men tyń zertteýler júrgizý máseleleri talqylandy.
«Dóńgelek ústel» barysynda «Altyn Qyran Foundation» qoǵamdyq qorynyń tóraǵasy Islambek Saljanov: «Birtýar tulǵa, ǵulama ǵalym Máshhúr Júsip Kópeıulynyń esimi ár qazaq úshin qasterli. «Altyn qyran» qoǵamdyq qory Máshhúr Júsiptiń shóberesi Abaı Sharapıev aǵamyzdyń kitabyn basyp shyǵarýǵa qoldaý kórsetti. Bul eńbek máshhúrtanýǵa úles qosyp, oqyrmandardyń yqylasyna ıe bolady degen úmittemiz», — dep óz oıymen bólisti. İs-sharada uly tulǵanyń dinı jáne rýhanı qyry, ǵylymı jáne etnografıalyq eńbegi, egemendik pen ult azattyǵy jolyndaǵy qyzmeti, jańarý, ulttyq bolmysty damytý, kásip ıgerý týraly oılary tarqatylyp ortaǵa salyndy.
Solardyń biri Máshhúr Júsip 1907 jyly «Saryarqa kimdiki?» atty kitaby shyǵyp, onda patsha úkimetiniń Qazaq jerin otarlaý týraly jazylady. Qazan qalasynda bul kitapty basyp shyǵarǵan baspaǵa 12 myń som aıyp salynyp, 14 adam sottalady. Máshhúrdi tutqyndaý týraly jarlyq shyqqannan keıin ol týǵan jerin tastap, Qazaqstannyń ońtústigine qaraı ketýge májbúr bolady. Buǵan qosa onyń «Aıqap» jýrnaly men «Dala ýálaıaty» gazetinde saıasat, din, sharýashylyq, mektep pen bilim týraly maqalalary shyqqan edi.
Jıynda tusaýy kesilgen «Máshhúr Júsiptiń tylsym álemi» atty kitapta onyń ómiri men shyǵarmashylyǵy keńinen baıandalady. Kitap buryn-sońdy jarıalanbaǵan materıaldarymen qundy.