Almaty polısıasy jol qozǵalysy erejelerin buzǵany úshin jazanyń bultartpaý qaǵıdasy týraly eske saldy.
Kishigirim is-árekettiń ózi úlken qatelikterdiń alǵysharty bolatyny belgili, onyń baǵasy – adam ómiri, dep habarlaıdy Almaty-akshamy.kz Polisia.kz-ke silteme jasap.
«Polısıa, “nóldik tózbeýshilik” qaǵıdatyn, jasalǵan quqyq buzýshylyq úshin jazanyń bultartpastyǵyn qamtamasyz etý, aıyppuldardy óndirip alýdyń tıimdiligin arttyrý maqsatynda turaqty negizde jol qozǵalysy erejelerin óreskel buzýdy anyqtaý boıynsha maqsatty is-sharalar júrgizedi. Jyl basynan beri 653 ákimshilik is qarastyrý jáne sheshim qabyldaý úshin ákimshilik sotqa joldandy. Onyń ishinde 437-si kólik quralyn mas kúıde basqarý derekteri boıynsha, 26-sy – qarama-qarsy qozǵalys jolaǵyna shyǵyp ketý derekteri boıynsha, 17-si – medısınalyq tekserýden ótýden bas tartqany úshin, 4 – jalǵan nómirdi avtokólikke ornatqany úshin jáne taǵy 2 – kólik quralyna stroboskop pen SGÝ ornatqany úshin. Nátıjesinde sottyń sheshimimen 376 júrgizýshi kólik quralyn basqarý quqyǵynan aıyryldy, 398 júrgizýshi ákimshilik qamaýǵa alyndy», – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Baıandamashy qala aýmaǵynda boryshkerlerdi, sondaı-aq óz erkimen ákimshilik aıyppuldy ýaqtyly tólemegen adamdardy anyqtaý sharalary júrgizilip jatqanyn jetkizdi. Kólik quraldaryn mamandandyrylǵan turaqqa ornalastyrý jáne qamaýǵa alý túrindegi ákimshilik sharalardy qoldaný arqyly boryshkerlerdi anyqtaý jumystary kúsheıtildi.