Almaty oblysynda mas kúıinde kólik basqarýdyń qaıtalanǵan 47 faktisi anyqtalyp, zań buzýshylar qylmystyq jaýapkershilikke tartyldy, dep habarlaıdy aqshamnews.kz
Jyl basynan beri oblys boıynsha alkogóldik jáne esirtkilik mas kúıde kólik basqarǵany úshin 768 adam ákimshilik jáne qylmystyq jaýapkershilikke tartylǵan. Bul sannyń ishinde mas kúıinde rúlge qaıta otyrǵan 47 júrgizýshi erekshe nazarǵa ilindi.
Patrúldik polısıa mundaı buzýshylardy anyqtaý úshin únemi reıdtik sharalar uıymdastyryp keledi. Bul jumystardyń basty maqsaty – jol qozǵalysy qaýipsizdigin qamtamasyz etý jáne qaıtalanatyn quqyqbuzýshylyqtardyń aldyn alý.
Osyndaı buzýshylyqtardyń biri Eńbekshiqazaq aýdanynda tirkeldi. 35 jastaǵy er adam 2023 jyly qazan aıynda sot sheshimimen ómir boıy júrgizýshi kýáliginen aıyrylǵanyna qaramastan, qaıtadan rúlge otyrǵan. Patrúldik polısıa ony ustap, saraptama nátıjesinde esirtki qoldanǵanyn anyqtady. Sottyń sheshimi boıynsha, tártip buzýshy eki jylǵa bas bostandyǵynan aıyryldy.
Óńirde quqyqbuzýshylyqtardyń aldyn alý úshin arnaıy baqylaý sharalary kúsheıtildi. Buryn mas kúıinde kólik basqarǵan júrgizýshilerdiń tizimi patrúldik polısıanyń erekshe baqylaýyna berilgen. "Quqyqtyq tártip" jedel-profılaktıkalyq is-sharasy arqyly mas júrgizýshiler men jasyryn esirtki tutynýshylardy anyqtaý jumystary jalǵasýda.
Polıseıler rúlde otyrǵan ár azamatty óz qaýipsizdigi men aınalasyndaǵylardyń amandyǵyna jaýapkershilikpen qaraýǵa shaqyrady. Mundaı zań buzýshylyqtar tek quqyqtyq jazany ǵana emes, sonymen birge qaıǵyly oqıǵalardy da týdyratynyn eskerý qajet. Joldardaǵy qaýipsizdikti qamtamasyz etý – barlyǵymyzdyń ortaq mindetimiz.