Medısına qyzmetkerleriniń maýsymnyń úshinshi jeksenbisinde atap ótiletin kásibı merekesi bıyl búginge, ıaǵnı 16 maýsymǵa sáıkes kelip tur.
Kardıologıa jáne ishki aýrýlar ǴZI Basqarma tóraǵasy Marat Pashımov osy aıtýly kúni ınstıtýttyń qyzmeti týraly aıtyp berdi, dep habarlaıdy Almaty-akshamy.kz
«Biz úshin bizdiń mamandyǵymyz – ómir saltymyz. Men jáne meniń áriptesterim eń izgi de jaýapty mamandyqtardyń birin tańdadyq. Biz kún saıyn, saǵat saıyn, mınýt saıyn qıyn jaǵdaılarda kúrdeli sheshimder qabyldaımyz jáne adamdardyń deni saý bolýyna yqpal etemiz», – deıdi Marat Orynbasaruly.
Keńestik torakaldy hırýrg, kardıologıadaǵy ınovasıalyq ádisterdiń avtory Nıkolaı Amosov: «Medısınadan ne talap etiledi? Kóp nárse qajet emes – tek durys dıagnoz qoıý jáne durys emdeý», – degen eken. Atalǵan ınstıtýt dárigerleri de osy údeden shyǵyp júr desek qatelespeımiz.
«Bizdiń dárigerler adamdarǵa tıimdi kómek kórsetetinin atap ótkim keledi. Bizde elimizdiń jetekshi mamandary jumys isteıdi, dıagnostıkada biz sońǵy býynnyń medısınalyq jabdyqtaryn qoldanamyz. Tek 2023 jyly 3D qaıta qurý jáne KT perfýzıasy men tolyq kardıopaketi bar premıým kompúterlik tomografyn; 2 saraptamalyq últradybystyq jáne portatıvti últradybystyq apparattaryn; ottegi stansıasyn; tósek janyndaǵy monıtorlar; IVL apparattaryn; fýnksıonaldy kereýetter; Holter, qan qysymy jáne EKG monıtorıńi júıelerin, reanımasıalyq brıgadalarǵa arnalǵan sanıtarlyq avtokólik jáne t.b.satyp aldyq», – deıdi Marat Orynbasaruly sózin jalǵastyryp.
Iá, olar el turǵyndaryna joǵary tehnologıalyq, mamandandyrylǵan, stasıonardy almastyratyn, konsýltasıalyq-dıagnostıkalyq medısınalyq kómek kórsetedi. Sondaı-aq ǵylymı-zertteý, bilim berý qyzmetimen de aınalysady. Mamandar óńirlerdiń medısınalyq uıymdaryna uıymdastyrýshylyq-ádistemelik, praktıkalyq kómek kórsetedi, densaýlyq saqtaý salasynda saraptama júrgizedi.
Mańyzdy daǵdylardyń biri – komandada jumys isteı bilý. Óıtkeni pasıenttiń saýyǵýy medısına qyzmetkerleriniń birlesken kúsh-jigeriniń nátıjesi ekeni sózsiz.
«Biz – bir komandamyz! KİAǴZI – kóptegen jyldar boıy dıagnostıkalyq ádisterdi jetildirýge úles qosyp, asqazan-ishek joldarynyń patologıasy bar pasıentterge kómek kórsetetin jetekshi respýblıkalyq ortalyqtarynyń biri. 2023 jyly bir balondy enteroskopıa jáne ishektiń qabyný aýrýlary kezindegi toq ishektiń tarylýyn keńeıtetin balondy dılatasıasy sıaqty jańa tehnologıalar engizildi. Bizdiń bazamyzda dárigerlerge 3 jáne 4 deńgeıdegi mamandandyrylǵan kómek kórsetetin İshektiń qabyný aýrýlaryn úılestirý ortalyǵy jumys isteıdi: bul bilim berý ortalyǵy, el óńirleriniń dárigerlerine konsýltasıalyq-ádistemelik kómek (telemedısınalyq konsýltasıalar) jáne pasıentterdi ambýlatorıalyq emdeýde konsaltıń. Onyń basynda ǵylymı jáne ınovasıalyq qyzmet jónindegi orynbasarym Jamılá Kaıbýllaeva tur. Medısına ǵylymdarynyń kandıdaty, joǵary sanatty gastroenterolog Jamılá Ahtanqyzy barlyq óńirden kelgen kóptegen pasıentke kómektesedi, mamandarǵa ádistemelik kómek kórsetedi, elimizdiń gastroenterologtary úshin bilim berý is-sharalaryn uıymdastyrady jáne belsendi ǵylymı qyzmet júrgizedi», – dep atap ótti klınıkanyń birinshi basshysy.
Kardıolog dárigerler – erekshe adamdar. Olaı deıtinimiz, olar ómirlik mańyzdy organ úshin jaýap beredi. Osyndaı dárigerlerdiń biri – densaýlyq saqtaý salasynda 30 jyldan astam jemisti eńbek etip kele jatqan Gúlnara Ospanova. Ol – joǵary sanatty dáriger, m.ǵ.k., eń tájirıbeli mamandardyń biri, 15 jyldan astam ýaqyt kardıologıalyq beıindegi bólimshelerdi basqardy. Bıyl Gúlnara Ermahanqyzy atalǵan ınstıtýtta emdeý jumysy jónindegi dırektor bolyp taǵaıyndaldy.
Asylhan Parımbekov 16 jyl boıy rentgenhırýrg, ıntervensıalyq arıtmolog bolyp jumys isteıdi, onyń ishinde ınstıtýttaǵy qoltańbasyna 13 jyl. Basqarma tóraǵasynyń aıtýynsha, ol kásibı damýǵa umtylý, joǵary jaýapkershilik sıaqty qasıetterimen erekshelenedi. Novosıbırsk qalasyndaǵy akademık E.Meshalkın atyndaǵy Ulttyq medısınalyq zertteý ortalyǵynda, Máskeý qalasyndaǵy A.Bakýlev atyndaǵy Júrek-qan tamyrlary hırýrgıasy UMZO-da, Germanıa, Nıderlandy jáne Izraılde bilim alǵan. 2011 jyldan bastap klınıkada júrekishilik elektrofızıologıalyq zertteýdi, júrektiń arıtmogendik qurylymdarynyń radıojıilik jáne krıoablásıasyn, elektrokardıostımýlátordy, kardıoverter-defıbrıllátordy, júrekti qaıta sınhrondaý terapıasyna arnalǵan júıeni ımplantasıalaýdy sátti júrgizedi.
Medısınalyq statısıka bólimi – mekeme qyzmetiniń mańyzdy qurylymynyń biri. Josparlaýda medstatıstıka mańyzdy ról atqarady. Statısıka arqyly basymdyqtar anyqtalady jáne resýrstardy bólý týraly negizdelgen sheshimder qabyldanady. Sondyqtan Aınash Malaeva basshylyq etip otyrǵan bul bólimniń róli de medısına salasy úshin asa erekshe.
«Byltyr biz 5 jyl merzimge ınstıtýsıonaldyq akredıtteý jáne rezıdentýranyń 5 mamandyǵy boıynsha mamandandyrylǵan akredıtteý sertıfıkattaryn aldyq. Kelesi aıda ınstıtýttyń JCI joǵary sapa standartyna jáne Ulttyq akredıtteýdiń joǵary sanatyna sáıkestigin qaıta rastaýymyz kerek. Materıaldyq-tehnıkalyq bazany odan ári jaqsartýǵa; oqytýǵa basa nazar aýdara otyryp, kadrlyq áleýetti kúsheıtýge; emdeýdiń jańa ádisterin engizý jáne joǵary tehnologıalyq medısınalyq qyzmetter kórsetý úshin operatıvtik aralasý kólemin ulǵaıtýǵa erekshe nazar aýdarylatyn bolady», dedi Kardıologıa jáne ishki aýrýlar ǴZI Basqarma tóraǵasy Marat Pashımov.