QR Premer-Mınıstriniń birinshi orynbasary Roman Sklárdyń tóraǵalyǵymen Investısıa tartý jónindegi keńestiń kezekti otyrysy ótti, dep habarlaıdy almaty-akshamy.kz
Talqylaý sheńberinde ınvestısıalyq jobalardy «Jasyl dáliz» tetigine engizý krıterııleri qaraldy. Atalǵan krıterııler ashyqtyqty arttyrýǵa jáne ınvestorlardyń atqarýshy bılik organdarymen ózara is-qımylyn jeńildetýge baǵyttalǵan.
Jıyn barysynda Investısıalar týraly kelisimniń tetigin jaqsartýǵa erekshe nazar aýdaryldy. Usynylǵan tetik ótinimderdi qaraý ýaqytyn 12 aıdan 3 aıǵa deıin qysqartýǵa jáne rásimderdi jeńildetýge baǵyttalǵan, bul ınvestısıalar salasynda neǵurlym tıimdi jumys isteýge yqpal etedi.
Sonymen qatar avtojol qurylysy salasyna ınvestısıa tartý máselesi qaraldy. Jalpy, ınvestısıalyq masshtabta bekitilgen sharalar otandyq kompanıalardyń básekege qabilettiligin arttyrady jáne olardy iri avtojol jobalaryn iske asyrýǵa tartýǵa múmkindik beredi.
Sondaı-aq otyrysta qatty turmystyq qaldyqtardy energetıkalyq kádege jaratýdy odan ári damytý máselesi talqylandy. Bul sala ınvestısıa tartý úshin perspektıvaly salalardyń biri bolyp sanalady.
Otyrys sheńberinde farmasevtıka jáne qatty turmystyq qaldyqtar salasyndaǵy jekelegen ınvestısıalyq jobalardyń problemalyq máseleleri kóterildi.
Óńirlik deńgeıde Qaraǵandy oblysy ákimdiginiń ınvestısıa tartý jónindegi qyzmeti qaraldy. Óńirde 12 myńnan astam jumys ornyn qura otyryp, 50 ınvestısıalyq jobadan turatyn pýl qalyptastyryldy.
Otyrys qorytyndysyna sáıkes, jaýapty memlekettik organdarǵa Investısıa tartý jónindegi keńestiń erekshe baqylaýynda bolatyn tapsyrmalar berildi.