Almaty qalasy İshki saıasat basqarmasynyń Qoǵamdyq damý ortalyǵy «Jumysshy mamandyqtar jyly» aıasynda jastarǵa arnalǵan taǵylymdy sharalar ótkizip keledi. Sonyń biregeıi – «Eńbek pen sheberlik» jobasynyń tórtinshi kezdesýi «Mansap joly» taqyrybynda uıymdastyryldy, dep habarlaıdy Aqshamnews.kz.
Jıynnyń negizgi maqsaty – óskeleń urpaqty eńbekke baýlý, bolashaq mamandyq tańdaýda senimdi baǵyt berý, sondaı-aq óndiris, qurylys jáne sándik-qoldanbaly óner salalaryndaǵy suranysqa ıe kásiptermen tanystyrý boldy.
Kezdesýge elimizdiń tabysty kompanıalarynyń basshylary arnaıy shaqyryldy. Olardyń qatarynda «SHERTER» kompanıasynyń jetekshisi Dılmanov Bahyt Álıevıch, «Orynbasaruly» kompanıasynyń basshysy Orynbasaruly Eljas jáne «Zamanauy» kompanıasynyń negizin qalaýshy Sársebek Zamanbek Sábıtuly bar. Bul tájirıbeli mamandar eńbek joldary men kásibı tájirıbelerin ortaǵa salyp, jastarǵa qundy keńester berdi.
Spıkerler óz kásipteriniń qalyptasý tarıhyn, eńbek jolyndaǵy alǵashqy qadamdaryn, kezdesken qıyndyqtary men jetken jetistikterin ashyq áńgimeledi. Árqaısysy kásibılikke jetýdiń basty sharttary – eńbekqorlyq, adaldyq jáne úzdiksiz izdenis ekenin erekshe atap ótti.
Kezdesý barysynda jastar ózderin tolǵandyrǵan suraqtaryn qoıyp, tabysty kásipıelerimen erkin pikir almasty. Mundaı ashyq suhbat jastarǵa eńbekke degen qulshynys syılap, kásibı baǵdaryn aıqyndaýǵa septigin tıgizdi.
Shara sońynda qatysýshylar jumysshy mamandyqtarynyń ómirde qanshalyqty qajet ekenin taǵy bir márte sezinip, bolashaqta mamandyq tańdaýda senimdi baǵyt alǵandaryn atap ótti.«Mansap joly» atty kezdesý – eńbek pen tabandylyqtyń qundylyǵyn dáriptegen taǵylymdy basqosý boldy. Bul jıyn jastardyń kásibı kózqarasyn qalyptastyrýǵa yqpal etip qana qoımaı, olardyń bolashaqqa degen senimin arttyrdy.