Mańǵystaý oblysyna sapary barysynda Halyq shtabynyń músheleri Senek aýylynyń turǵyndarymen aımaqtyń ózekti máselelerin talqylady.
Talqylaý barysynda aýylda jańa jumys oryndaryn ashý, nesıe alý, jańa óndiristerdi iske qosý jáne basqa da máseleler kóterildi. «Aýyl amanaty» baǵdarlamasy aıasynda memleket aýyl turǵyndaryna óz kásibin ashý úshin 2,5% mólsherlememen eleýli qarjy qarajat bóledi. Degenmen, jańa bıznesti sátti bastaý úshin senimdi elektr qýaty qajet, al bul máseleni AES qurylysy arqyly sheshýge bolady.
Sol kúni shtab músheleri Mańǵystaý oblysy jurtshylyǵymen jáne aımaq belsendilerimen kezdesti. Olar AES qurylysyn aımaq ekonomıkasyn ártaraptandyrý, ınvestısıa tartý jáne jańa jumys oryndaryn qurý úshin mańyzdy joba retinde talqylady. Shtab músheleri qazirgi ýaqytta Qazaqstan jyl saıyn mıllıardtaǵan kVt/saǵ elektr energıasyn ımporttaıtynyn eske saldy. Jyl saıyn bul kórsetkish artyp keledi. Energıa tapshylyǵyna baılanysty kóptegen perspektıvaly óndirister tek qaǵaz betinde qalyp otyr. Osy máselelerdi AES sheshedi. Qazirgi ýaqytta Mańǵystaýdy eldiń biryńǵaı energetıkalyq júıesine qosý jumystary júrgizilip jatyr, ıaǵnı bolashaqta barlyq batys oblystar beıbit atom energıasyn alýshylarǵa aınalýy múmkin.
Shtab músheleri aımaq turǵyndarynyń nazaryn atom energetıkasynyń jalpyálemdik trend ekenine aýdardy. Búgingi tańda bul joldy ekonomıkalyq turǵydan damyǵan kóptegen elder – AQSH, Fransıa, Qytaı jáne basqa da memleketter tańdaýda. Mysaly, Belgıa josparlaǵan eki reaktordyń jumys isteý merzimin 10 jylǵa uzartty. Jaqynda Túrkıada AES qurylysy aıaqtaldy. Bıyl Ózbekstan atom elektr stansıasyn salý týraly sheshim qabyldady.
Jalpy alǵanda, mańǵystaýlyqtar atom elektr stansıasyn salýǵa joǵary qyzyǵýshylyq tanytyp, Memleket basshysynyń reformalaryn qoldaýǵa daıyn ekendikterin bildirdi.