Áleýmettik jelilerde Mańǵystaý oblysyndaǵy shekara zastavasynda bıyl kóktemde áskerge shaqyrylǵan sarbaz qaza bolǵany týraly aqparat tarady, - dep habarlaıdy Aqshamnews.kz tilshisi.
Oqıǵa 7 qazanda "Ústirt" shekara zastavasynda bolǵan. Bólim komandıriniń tapsyrmasymen áskerı qyzmetshi dızel-generator radıatoryn jýý úshin benzın ákelý maqsatynda qoımaǵa barǵan.
Tapsyrmany oryndaý kezinde sarbaz janarmaı býyna ýlanyp, esinen tanyp qalǵan. Shamamen 10 mınýttan keıin jerde jatqan kúıde tabylǵan. Sarbaz zardap shekken qyzmetshige kómek kórsetýge tyrysqan, alaıda ol kóz jumǵan.
UQK baspasóz qyzmeti áskerı qyzmetshiniń qaza bolǵany týraly aqparatty rastady.
"Mańǵystaý oblysy boıynsha Shekara qyzmeti departamentinde qaıǵyly jaǵdaı boldy, merzimdi qyzmettegi áskerı qyzmetshi qaza tapty. Aldyn ala málimet boıynsha, qaıǵyly oqıǵaǵa tehnıkalyq jumystar kezinde qaýipsizdik sharalarynyń saqtalmaýy sebep bolǵan", – dep habarlady UQK.
Vedomstvonyń málimetinshe, polısıa organdary qylmystyq is qozǵaǵan, qosymsha qyzmettik tekseris te júrgizilip jatyr.
"UQK Shekara qyzmeti qaza bolǵan sarbazdyń týǵan-týystary men jaqyndaryna qaıǵyryp, kóńil aıtady", – delingen baspasóz qyzmetiniń habarlamasynda.