Instagram áleýmettik jelisinde mandarın qabyǵynyń paıdasy týraly vıdeo taralýda. Ony soda qosyp qaınatsa, bir aı qoldanǵannan keıin ájimniń 90% ketiretin losón shyǵady eken. Bul quraldyń jasartatyn áseri bar ma ekenin Stopfake.kz anyqtady.
Mandarın qabyǵynyń erekshe qasıetteri týraly aqparatty amerıkalyq podkaster Bret Vaınshteın taratqan. Ol COVID-19 emdeý ádisteri men aýrýǵa qarsy vaksınalar týraly jalǵan málimdemeleri, sondaı-aq AITV jáne JITS týraly jalǵan aqparat taratqany úshin synǵa ushyraǵan. Atap aıtqanda, Vaınshteın ıvermektın COVID-19-dyń aldyn alady jáne emdeıdi dep málimdegen. Bul feık aqparatty kóptegen halyqaralyq medısınalyq uıymdar, sonyń ishinde DDU joqqa shyǵardy.
Basqa sıtrýs sekildi, mandarın de S dárýmeniniń kózi bolyp tabylady. Sonymen qatar, sıtrýs jemisteri natrıı, kalıı, kálsı, mys, temir, magnıı, marganes, myrysh, folıı qyshqylyna baı. Olar ımýnıtetti nyǵaıtady, ishek jumysyn qalypqa keltiredi, holesterın deńgeıin baqylaıdy, kórý qabiletin, teri men shashtyń kúıin jaqsartady.
Zertteýshiler mandarın qabyǵynyń jaǵymdy qasıetterin atap ótedi. Onyń quramynda sýperflavonoıdtar sanatyna jatatyn antıoksıdant bar. Ǵylymı eńbekterde sýperflavonoıdtardyń qandaǵy holesterındi tómendetýge yqpal ete alatyndyǵy jazylǵan. Sıtrýs qabyǵynda kezdesetin efır maılary antıseptıkalyq jáne qabynýǵa qarsy qasıetterge ıe.
Alaıda, atalǵan artyqshylyqtarǵa qaramastan, mandarın qabyǵy bet terisine zıan keltirýi de múmkin. Bul óte kúshti alergen.
Mandarın terisinen jasalǵan losóndy qoldaný saldarynan alergıalyq reaksıa bolýy yqtımal, aýyz, erin, til nemese tamaq qyshyp, isinedi, esekjem shyǵyp, aýyr jaǵdaılarda tynys alý qıyndaıdy.
Soda (natrıı bıkarbonaty) kosmetologıada tazartý maqsatynda jıi qoldanylady. Ol teriniń lastanýyn jáne óli jasýshalardy joıady. Degenmen, soda sezimtal terige agressıvti áser etip, titirkený nemese qurǵaqtyq týdyrady, ásirese uzaq ýaqyt qoldanǵanda.
«Mandarın qabyǵynan jasalǵan losón bir aıda bettegi ájimniń 90% ketiretini» týraly vıdeonyń ǵylymı negizi joq. Mandarın qabyǵynyń quramynda antıoksıdanttar men efır maılary sıaqty paıdaly zattar bar. Biraq ol alergıalyq reaksıalar da týdyrýy múmkin, al soda kosmetologıada qoldanylǵanymen, sezimtal terini zaqymdaýy yqtımal. Betti jasartý úshin dermatologtar teksergen quraldardy qoldaný kerek.