AEK mólsheriniń ósýine baılanysty saqtandyrý jarnalary men aýdarymdar mólsheri ózgerdi.
Bul týraly «Áleýmettik medısınalyq saqtandyrý qory» KEAQ Aqmola oblysy boıynsha fılıalynyń dırektory Álıa Júsipova túsindirip berdi, dep habarlaıdy Almaty-akshamy.kz Qazaqparatqa silteme jasap.
Álıa Júsipovanyń aıtýynsha, 2022 jyldyń 1 qańtarynan bastap, eń tómengi jalaqy (ETJ) men aılyq eseptik kórsetkish (AEK) mólsheriniń ósýine baılanysty mindetti áleýmettik medısınalyq saqtandyrýǵa jarnalar men aýdarymdar mólsheri ózgerdi.
«Jumys berýshi jumyskerdiń jalaqysynyń 3 paıyzyn aýdarady, biraq 18 myń teńgeden aspaıdy, óıtkeni esepteý obektisi 10 ETJ aspaýy tıis. Eger qyzmetker 15 jeńildik sanatynyń birine jatatyn bolsa, onda ol úshin aýdarym jasaýdyń qajeti joq», - dep túsindirdi Álıa Júsipova.
Qyzmetkerler, onyń ishinde azamattyq-quqyqtyq sıpattaǵy sharttar boıynsha tabys alatyndar óz tabysynyń 2 paıyzyn aýdarady, biraq 12 myń teńgeden aspaıdy, óıtkeni esepteý obektisi 10 ETJ aspaýy tıis. Dara kásipkerler jáne jeke tájirıbemen aınalysatyn adamdar úshin - ETJ-niń 1,4 eselengen mólsheriniń 5 paıyzy nemese 4200 teńge. Ózin-ózi jumyspen qamtyǵan azamattar BJT tóleıdi: qala turǵyndary úshin - 1 AEK nemese 3 063 teńge; aýyl turǵyndary úshin - 0,5 AEK nemese 1 531,5 teńge. Derbes tóleýshiler - ETJ-niń 5 paıyzy nemese 3000 teńge. Memleket azamattardyń jeńildikti 15 sanaty úshin tóleıdi, bul 11 mıllıonnan astam adam. Aǵymdaǵy jyly bir adam úshin jarna mólsheri 3 614,2 teńgeni quraıdy.
«Naýqasta belgilengen áleýmettik máni bar aýrý bolǵan salalyq mamandardyń merzimdi josparǵa saı barýy, dıagnostıkalyq zertteýler (aspaptyq jáne zerthanalyq), sondaı-aq ýchaskelik dáriger men meıirbıkeniń qabyldaýy jáne dári-dármekpen qamtamasyz etý áleýmettik mańyzy bar aýrýdy ambýlatorıalyq deńgeıde emdeý tizbesine kiredi. Eger naýqasta sozylmaly aýrýdyń asqynýy paıda bolsa nemese josparly saýyqtyrý talap etilse, onda mundaı naýqas kúndizgi nemese táýliktik stasıonarǵa jatqyzylýy múmkin», - dep tolyqtyrdy Á.Júsipova.
Ol atap ótkendeı, saqtandyrylmaǵan naýqas tegin medısınalyq kómektiń kepildik berilgen kóleminiń (TMKKK) tizbesine kiretin qyzmetterdi, ıaǵnı jedel medısınalyq kómekti, alǵashqy medısınalyq-sanıtarlyq kómekti ala alady. Onyń ishinde ýchaskelik dárigerdi qabyldaý, aýrýlardy dıagnostıkalaý jáne emdeý, profılaktıka, saýyqtyrý, ımmýndaý, salaýatty ómir saltyn ustaný, aktıv, patronaj, sozylmaly aýrýlary bar pasıentterdi dınamıkalyq (dıspanserlik) baqylaý, sozylmaly aýrýlar men áleýmettik máni bar aýrýlardy emdeý kezinde kúndizgi stasıonarda jáne táýlik boıy stasıonarda medısınalyq kómek kórsetý,týberkýlez boıynsha medısınalyq ońaltý, pallıatıvtik kómek, transplanttaý, shetelde emdeý, dári-dármekpen qamtamasyz etý bar.