Búginde medısınalyq ońaltý mindetti áleýmettik medısınalyq saqtandyrý paketindegi baǵasy qymbat ári eń suranysqa ıe qyzmetterdiń biri. Reabılıtasıany ınsýlt nemese jaraqat alǵan, tize nemese jambas býyndaryn almastyrǵan, túrli sozylmaly aýrýlarmen aýyratyn pasıentter qajet etedi.
2025 jyly Almaty qalasy boıynsha MÁMS paketi sheńberinde kórsetiletin reabılıtasıalyq qyzmetterge 8 mlrd teńgege jýyq qarjy qarastyrylǵan. Qyzmetti Almaty qalasyndaǵy 81 emdeý mekemesi kórsetedi.
Saqtandyrý arqyly medısınalyq ońaltýdan kimder óte alady? Reabılıtasıadan ótý joldary qandaı? Osy jáne ózge de saýaldarǵa Medısınalyq saqtandyrý qorynyń Almaty fılıaly ókilderi jaýap berdi.
Medısınalyq ońaltý qyzmetin qandaı klınıkalar kórsetedi?
2025 jyly Almatyda 81 uıym medısınalyq ońaltý qyzmetin kórsetýge tapsyrys aldy. Tizimge emhanalar, aýrýhanalar, jeke menshik medısına ortalyqtary, ońaltý jáne sporttyq-ońaltý keshenderi, shıpajaı keshenderi, medısınalyq-áleýmettik mekemeler, emdeý-saýyqtyrý keshenderi engen. Olardyń tizimimen Qordyń msqory.kz resmı saıty arqyly tanysýǵa bolady.
Medısınalyq ońaltý kimderge kórsetiledi?
Reabılıtasıadan:
- negizgi nemese sozylmaly aýrýdy emdeý qajet bolǵanda;
- ınsýlt t.b. syndy aýyr naýqastardan keıin;
- keıbir hırýrgıalyq operasıalardan keıin;
- jaraqat alǵannan keıin;
- syrqat saldarynan adamnyń qımyl-qozǵalysy shektelgen jaǵdaılarda ótýge bolady.
Pasıent buryn ońaltýdan ótpegen. Neden bastaǵan jón?
1. Kez-kelgen pasıent medısınalyq qyzmetke júginý úshin eń aldymen tirkelgen emhanasyna barady.
2. Emdeýshi dáriger reabılıtolog mamannan nemese mýltıdısıplınarlyq top mamandarynan konsýltasıa alýǵa jiberedi.
3. Olar aýrýdyń paıda bolýy men kúsheıý qarqynyna, syrqattyń densaýlyq jaǵdaıyna baılanysty málimetterdi eskere otyryp, ońaltýǵa degen qajettilik bar-joǵyn aıqyndaıdy. Bastapqy reabılıtasıalyq dıagnoz qoıyp, pasıent densaýlyǵyn qalpyna keltirý josparyn, kýrstyń merzimin t.b. anyqtaıdy.
4. Eger keshendi tekserý nátıjesinde reabılıtasıa tıimdi dep tabylsa, pasıent ońaltýdan ambýlatorıada, stasıonarda, stasıonardy almastyratyn emdeý mekemesinde, úıde óte alady. Josparly túrde em qabyldaıtyn pasıent stasıonarǵa «Aýrýhanaǵa jatqyzý búrosy» portaly arqyly jatqyzylady.
Medısınalyq ońaltý úsh kezeńnen turady
Birinshisi aýrýy asqynyp turǵan naýqastarǵa, hırýrgıalyq operasıa jasatqan, jaraqat alǵan adamdarǵa arnalǵan. Ol stasıonarlardyń qurylymdyq bólimshelerinde júrgiziledi.
Eger aýrýhanaǵa jatqyzý qajet bolmasa, medısınalyq kómek kórsetilgennen keıin jáne negizgi aýrý emdelip bolǵannan keıin pasıent ońaltýdyń ekinshi nemese úshinshi kezeńine jiberiledi.
Ońaltýdyń ekinshi kezeńi mamandandyrylǵan bólimshelerde nemese respýblıkalyq densaýlyq saqtaý uıymdary, mamandandyrylǵan ońaltý ortalyqtary men kópbeıindi stasıonarlar bazasynda ótedi. Bul kezeń aýrý bastalǵan sátten bastap alty aı ishinde júrgizý qajet.
Úshinshi kezeńde medısınalyq ońaltý emhana-ambýlatorıa deńgeıinde, kúndizgi jáne táýlik boıǵy stasıonarlarda, ońaltý ortalyqtarynda, sanatorııler men kýrorttarda, úıdegi stasıonar jaǵdaıynda, sondaı-aq qashyqtyqtan júrgiziledi.