«İsim ońsyn deseńiz, sol istiń mamany bolyńyz,
Dańqym shyqsyn deseńiz, kópshiliktiń adamy bolyńyz» dep halyq danalyǵynda aıtylǵandaı, meniń tańdaǵan mamandyǵym halyqqa, elge eń qajetti mamandyq, tek ony úırenip, meńgerip, naǵyz maıtalman maman bolý meniń quzyretimde.
Mamandyq tańdaýǵa meniń bala armanym, aldyma qoıǵan maqsattarym bastaý boldy. Maqsatqa jetý úshin armanyńdy durys tańdaýyń kerek. Eger arman iske aspasa, maqsatymnyń qur bolǵany. Eń bastysy, kim bolǵyńyz keletinin anyqtaý jáne óz maqsatyńa tabandylyqpen jetýge tyrysý. Ómirdiń qaı salasynda jetistikke jetýdi qalasań da, óz jolyńdaǵy qıynshylyqtardy jeńe otyryp, búkil qoǵamnyń ıgiligi úshin adal eńbek etý.
Kishkene kezimde aıdyń jaryǵyna, kúnniń jylýyna qyzyǵa qarap, olardyń adamǵa paıdasy jaıly kóp oılanatynmyn. Eseıe kele, men de adamdarǵa jaryq, jylý syılasam degen oı paıda boldy. Ol úshin eń aldymen adamnyń júreginde jylýlyq bolýy kerektigin sezetinmin. Mine, er jetip, es bilgennen keıin adamdarǵa júrek jylýymen birge paıdasy mol elektr mamany bolý arqyly álemge jaryq syılaýǵa bolatynyn túsindim. Osylaısha men elektr mamany bolýǵa sheshim qabyldap, Almaty qalasyndaǵy elektromehanıka kolejine oqýǵa tústim.
Qıyndyqtary men qyzyqtary qatar kezdesetin stýdenttik kezeńniń ár kúnin izdenýmen, talpynyspen úırensem, bilsem dep kirisip ketip, qazir mine 2-kýrsty da bastadyq.
Sabaqtan tys ýaqytymda teorıadan ótken bilimimdi tájirıbe júzinde jetildirý úshin ustazdardan qosymsha dáris alýǵa tyrysamyn. Sebebi, tehnologıanyń damyǵan ýaqytynda elektr salasy da qarqyndy damýda, sondyqtan ózgerister men jańashyldyqtyń aǵymyna ilesip, bilim men biligimizdi kún saıyn arttyryp otyrýymyz kerek. Qazirgi tańda ómirimizdi elektrsiz elestetý múmkin emes.
Shaǵyn úı-jaıdan bastap úlken zaýyttardyń jumysy tikeleı elektr júıesine baılanysty. Sondyqtan da, bul mamandyq árdaıym suranysqa ıe. Elektr mamany jumys tájirıbesi jáne bilim deńgeıine baılanysty túrli dárejelerge bólinedi.
Eger óz isińniń mamany bolsań, bul salada úlken jetistikterge jetýge bolady. Sol sebepten óz mamandyǵymdy, biliktiligimdi árqashan jetildirip, naǵyz maman bolýǵa talpynýdamyn. Elektr mamanynyń jumysy dáldikti, muqıattylyqty, jaýapkershilik pen saqtyqty qajet etedi.
Qazirdiń ózinde bos ýaqytymda osy salada aǵama kómektese júrip, mamandyǵymdy qatesiz tapqanyma kózim jetýde. Ózim symdar men elektr jabdyqtaryn montajdaý jumystaryn qyzyǵa atqaramyn. Eger adamda óz mamandyǵyna degen súıispenshilik bolsa, onda jumysta bereke de, tabys ta, jetistik te bolary sózsiz. Men de bolashaqta adamdardyń jaılylyǵy men qaýipsizdigi úshin, ǵalamshardyń ekologıalyq bolashaǵy úshin qyzmet etetinimdi maqtan etemin!
Almaty elektrmehanıka kolejiniń
2 kýrs stýdenti Aıbýsyn Bekzat Ásetuly