Aldaǵy jyldary muǵalimderge degen suranys artady.
Qazaqstan úkimeti aldaǵy jyldary suranysqa ıe bolatyn kásip túrlerin anyqtady, dep habarlaıdy Almaty-akshamy.kz.
«Eńbek resýrstaryn damytý ortalyǵy» AQ daıyndaǵan 2023-2030 jyldarǵa arnalǵan kadrlarǵa qajettiliktiń orta merzimdi boljamy negizinde sarapshylar taıaý jyldary neǵurlym talap etiletin qyzmetterdiń TOP-25 tobyn anyqtady»,- delingen Eńbekmıni baspasóz qyzmetiniń habarlamasynda.
Eń «qajet» – orta mektep muǵalimderi, býhgalterler, kúzetshiler, ınkasatorlar jáne soǵan baılanysty kásipter, dúken satýshylary jáne olardyń kómekshileri boldy.
ERDO taldaýshylary Ulttyq qyzmetter jikteýishiniń eń tolyq deńgeıinde TOP kásipterdi anyqtady. Ol kelesideı:
- Býhgalterler – 92 myń adam;
- Kúzetshiler, ınkasatorlar jáne soǵan baılanysty kásipter – 77,8 myń adam;
- Dúken satýshylary men olardyń kómekshileri – 70,2 myń adam;
- Áleýmettik ǵylymdar boıynsha orta mektep muǵalimderi – 45,2 myń adam;
- Avtokólik júrgizýshileri men shopyrlar – 45,1 myń adam;
- Kútim boıynsha ortasha medısınalyq personal – 40 myń adam;
- Jaratylystaný ǵylymdary boıynsha orta mektep muǵalimderi – 37,9 myń adam;
- Mektepke deıingi bilim beretin tárbıeshiler – 36,1 myń adam;
- Qonaqúıler men osyǵan uqsas mekemelerdegi tazalaýshylar men qyzmetshiler – 34,6 myń adam;
- Bastaýysh synyp muǵalimderi – 32,3 myń adam;
- Keńselerdegi tazalaýshylar – 25,3 myń adam;
- Shashtarazdar – 24,6 myń adam;
- Orta mektep muǵalimderi – 23,2 myń adam;
- Keńse qyzmetkerleri (jalpy beıini) – 22,1 myń adam;
- Kósheler men bazarlardaǵy saýdagerler – 21,7 myń adam;
- Ǵımarattardy qaraýshylar jáne kúzetshiler – 20,6 myń adam;
- Aspazdar – 20,5 myń adam;
- Basqa biliktiligi joq jumysshylar – 20,2 myń adam;
- Aralas ónim óndiretin fermerler men jumysshylar – 19,8 myń adam;
- Dástúrli tásilmen kókónis ósiretin fermerler men jumysshylar – 19,6 myń adam;
- Júk kóliginiń júrgizýshileri – 17,8 myń adam;
- Aýyl sharýashylyǵy ónimderin óndirýde biliktiligi joq jumysshylar – 16,6 myń adam;
- Aýla sypyrýshylar jáne ashyq aýmaqtardy tazalaýshylar – 16,5 myń adam;
- Jyljymaıtyn múlikpen jáne basqa da múlikpen operasıalar jónindegi agentter – 16,2 myń adam;
- Shtattaǵy zańgerler – 15,2 myń adam.
«Eger jıyntyq kórsetkishke qarasaq, bilim berý salasyndaǵy kásibı mamandar – barlyq qajettiliktiń 12,5%, jyljymaly jabdyqtyń júrgizýshileri men operatorlary – 8,2%, bıznes jáne ákimshilendirý salasyndaǵy kásibı mamandar – 6,8%, azamattar men menshikti qorǵaýdy júzege asyratyn qyzmetterdiń qyzmetkerleri – 5,3%, tazalaýshylar men qyzmetshiler – 5,1% suranysqa kóp ıe bolatynyn atap ótýge bolady», – dedi ERDO Boljaý departamenti dırektorynyń orynbasary Qaıyrbek Aıashev.
Eń az qajettilik «Ákimshilik salasyndaǵy basqa qyzmetkerler», «Jeke tutyný úshin ónim óndiretin aýyl sharýashylyǵy, balyq aýlaý jáne balyq ósirý sharýashylyǵy fermerleri», «Qolónershiler, dál quraldar, polıgrafıa jáne kartografıa boıynsha jumysshylar», «Ónimdi jınaýshylar men synaýshylar» jáne «Ańshylar men orman jáne balyq ónimderi óndirisiniń jumysshylary» toptarynda kútiledi. Boljam boıynsha, joǵaryda atalǵan barlyq mamandarǵa suranys 2030 jylǵa deıin shamamen 10,5 myń adamdy quraıdy.