Olar úshin «BIL», «Daryn» sıaqty mektepterge kvota bólinedi.
Oqý-aǵartý mınıstri Asqat Aımaǵambetov áleýmettik osal otbasylardan shyqqan balalarǵa mamandandyrylǵan mektepterge túsý úshin 15 paıyz kvota alýǵa múmkindik beretin buıryqqa qol qoıdy, dep habarlaıdy Almaty-akshamy.kz
«Endi osyndaı otbasylardan shyqqan 1500-ǵa deıin bala jańa kvota boıynsha «BIL», «Daryn» jáne t.b. mektepterge oqýǵa túse alady. Búgingi tańda jańa buıryqtyń arqasynda áleýmettik osal otbasylardan shyqqan balalar osyndaı mamandandyrylǵan mektepterge qabyldandy», - dep jazdy Aımaǵambetov Facebook-tegi jeke paraqshasynda.
Mınıstrdiń aıtýynsha, turmysy tómen bolǵandyqtan qosymsha bilim alýǵa múmkindigi joq balalar úshin osyndaı mektepterde oqýǵa múmkindik berý olardyń bolashaqtaǵy jetistikterine oń áser etedi.
Ol buǵan deıin Ulttyq qoǵamdyq senim keńesiniń usynystary aıasynda kolejder men joǵary oqý oryndaryna túsýge osyǵan uqsas kvotalar engizilgenin atap ótti. Sol sheshimniń arqasynda myńdaǵan balalar oqýǵa tústi.
«Biz jas daryndarǵa da, ózin áli kórsete almaǵandarǵa da teń jaǵdaı jasaýymyz kerek. Al ustazdarymyz ozat balalarǵa da, oqýda úlgerimi nashar bolsa da, qoldaý men jyly sózge muqtaj balalarǵa da meıirimmen qaraıdy dep úmittenemin», dep jazdy Asqat Aımaǵambetov.