Qazir qutyrý men brýselez jıi tirkelip jatyr.
Janýarlardyń adamdarǵa juǵatyn ótkir jáne sozylmaly ınfeksıalyq aýrýlarǵa shaldyǵýy jıiledi, dep habarlaıdy Almaty-akshamy.kz
Aýrýlarmen kúresýde oń qarqyn baıqalmaıdy
Qazaqstanda veterınarlyq ınspektorlardyń óz mindetterin atqarýǵa degen qulyqsyzdyǵy maldardyń qaýipti ınfeksıa juqtyrýyna sebep bolyp otyr.
Bul týraly Úkimet saǵatynda Májilistiń agrarlyq máseleler jónindegi komıtetiniń tóraǵasy Erlan Barlybaev málimdedi.
Onyń aıtýynsha, respýblıka óńirlerindegi veterınarlyq is-sharalar búdjetten bólingen qarajat esebinen aldyn alý sharalaryn júrgizýmen shektelip otyr.
«Inspektorlar juqpaly emes aýrýlar boıynsha eseptiń shynaıylyǵy úshin jaýapkershilikke tartylmaıdy. Janýarlardyń densaýlyǵyna monıtroıng júrgizý úshin qan bıohımıasyn (taldaýyn) júrgizýmen eshkim aınalysyp jatqan joq. Al bul epızotıkalyq jaǵymdy ahýaldy qalyptastyrýdyń negizi bolyp otyr. Sondyqtan sońǵy jyldary janýarlardyń adamdarǵa juǵatyn ótkir jáne sozylmaly ınfeksıalyq aýrýlarǵa shaldyǵýy jıiledi», - dedi Erlan Barlybaev.
Ol qazir qutyrý men brýselez jıi tirkelip jatqanyn jáne osy aýrýlarmen kúresýde oń qarqyn baıqalmaıtynyn atap ótti.
Mysaly, 2020-2021 jyldary brýselez juqtyrý 2%-ǵa, aýyl sharýashylyǵy janýarlaryndaǵy sibir jarasy – 6 ese, leptospıroz – 5 ese, anaerobty enterotoksemıa – 5 ese, vırýsty dıareıa jáne juqpaly rınotrahıt – 113%-ǵa ósken.
«Importtyq asyl tuqymdy iri qara maldy elge jetkizý boıynsha baǵdarlamalardy júzege asyrý da az qıyndyq týdyrǵan joq. Elge ınfeksıalyq rınotraheıt, blútang, nodýlárly dermatıt, Shmallenber derti jáne vırýsty dıareıa syndy aýrýlar ákelindi», - dedi Barlybaev.
Májilis depýtaty maldyń ınfeksıalyq aýrýlary, qyrylý jáne olardy erte soıýǵa májbúrlik, aýrýdan keıingi ahýalynyń nasharlyǵy, vaksınalaý jáne aýrýdy emdeýge ketken shyǵyn, sondaı-aq karantın sharalary sharýalardyń ǵana emes, búkil el ekonomıkasyna keri áser etip otyrǵanyn aıtty.