Elimizde baspanaǵa muqtaj azamattardyń máselesin 2026 jylǵa deıin qarastyrylǵan Turǵyn úı-kommýnaldy ınfraqurylymdy damytýdyń tujyrymdamasy aıasynda retteý kózdelip otyr. Bul týraly QR Parlament Májilisinde ótkizilgen dóńgelek ústelde QR IIDM Qurylys jáne TKSH isteri komıteti tóraǵasynyń orynbasary Baýyrjan Qabdol aıtty, dep habarlaıdy almaty-akshamy.kz
«Qazaqstannyń Halyq partıasy» fraksıasy uıymdastyrǵan is-sharaǵa Májilis depýtattary, Ulttyq ekonomıka jáne qarjy mınıstrlikteriniń, Strategıalyq josparlaý jáne reformalar agenttiginiń, Sybaılas jemqorlyqqa qarsy is-qımyl agenttiginiń, Qarjy naryǵyn retteý jáne damytý agenttiginiń, sondaı-aq «Otbasy bank» AQ men «Qazaqstandyq turǵyn úı kompanıasy» AQ ókilderi qatysty.
B.Qabdol aıtqandaı, Qazaqstanda baspana kezeginde turǵandardyń máselesin 2026 jylǵa deıingi Turǵyn úı-kommýnaldy ınfraqurylymdy damytýdyń tujyrymdamasy aıasynda sheshý kózdelgen. Soǵan sáıkes respýblıkalyq jáne jergilikti búdjet arqyly halyqtyń áleýmettik osal toptaryna (satyp alý quqyǵynsyz) jalǵa beriletin turǵyn úıdi salý nemese satyp alý qarastyrylady. Bıyl 10 myńnan asa páterdi satyp alý josparlanǵan. Buǵan qosa kiris kólemine baılanysty kezekte turǵandardyń sanattaryna oraı «Otbasy banki» arqyly 2-5% mólsherlemesi boıynsha kredıttik baspanany salyp, jeńildikpen nesıeleý kózdelgen. 2023 jyly 14 myńdaı kredıttik páterdiń qurylysyna 158,5 mlrd teńge jumsalmaq. Al «Otbasy banki» arqyly kezekte turǵandarǵa jeńildetilgen zaıym berý úshin bıyl 6,8 myń páter satyp alý kózdelgen. Sonymen qatar jeke turǵyn úı qoryndaǵy páterdiń jaldaý aqysyn sýbsıdıalaý (kóp balaly otbasylar, jetim balalar, 1-2 toptaǵy múgedektigi bar adamdar, syrqaty bar balalardy tárbıelep otyrǵan, otbasynyń bir múshesine shaqqanda kúnkóris deńgeıinen tómen tabysy bar otbasylar) jolǵa qoıylǵanyn aıta keteıik.
Halyqtyń tólem qabiletine baılanysty suranysty qanaǵattandyrý úshin tıimdi ıpotekalyq baǵdarlamalarǵa (QR Ulttyq banki bekitken ıpotekalyq baǵdarlamalar jáne «2-10-20», «5-10-20» jeńildetilgen kredıt) sáıkes bastapqy jarnanyń bir bóligin jergilikti atqarýshy organdar áleýmettik kómek retinde nemese búdjettik kredıt túrinde turǵyn úı sertıfıkatymen óteýi múmkin.
Budan basqa Qurylys jáne TKSH isteri komıteti tóraǵasynyń orynbasary kóppáterli turǵyn úı qurylysyna arnalǵan tetikter týraly aıtyp berdi.
«Turǵyn úı-qurylys kooperatıvine kóppáterli baspananyń qurylysyna baılanysty jer ýchaskesi berilip, qurylys uıymymen tıisti kelisimshart jasalady. Sodan keıin qajetti jumystar aıaqtalǵan boıda salynǵan turǵyn úıdi qabyldaýǵa qatysady», dedi B.Qabdol.
Bul oraıda mınıstrlik turǵyn úı-qurylys kooperatıviniń qyzmetin retteý maqsatynda 2019 jyly «Turǵyn úı qatynastary týraly» Zańyna tıisti túzetýler engizdi. Soǵan sáıkes azamattar kóppáterli turǵyn úıdiń qurylysyn atalǵan tetik arqyly júzege asyrýǵa múmkindik alyp otyr.
Óz kezeginde turǵyn úı-qurylys kooperatıvine qatysý kelisimsharttaryn tirkeýdi osy basqarmanyń (tóraǵasynyń) usynysy boıynsha belgili bir óńirdegi sáýlet, qala qurylysy jáne qurylys qyzmetine jaýapty jergilikti atqarýshy organdar júzege asyratynyn atap ótken jón. Bul qolǵa alynǵan amaldyń nátıjesinde merdiger kompanıalardyń alypsatarlyq áreketteri tyıylady dep kózdelgen.