Májilis depýtattarynyń negizgi jumysy - sapaly jáne naqty jumys isteıtin zańdardy qabyldaý. Bul týraly Májilistiń jalpy otyrysynda palata tóraǵasy Erlan Qoshanov aıtty, dep habarlaıdy almaty-akshamy.kz
«Memleket basshysynyń reformalarynyń nátıjesinde eldegi negizgi saıası ınstıtýttardyń barlyǵy jańǵyrdy. Ótken Májilis saılaýy sol jańarýdyń sońǵy satysy boldy. Oǵan dálel Májiliste alǵash ret 6 saıası partıa jáne birmandatty okrýgten saılanǵan depýtattar otyr. Bizdiń baǵdarlamalarymyz ben kózqarasymyz ártúrli bolǵanymen eldiń múddesi, memlekettiń múddesi máselelerine kelgende bárimizdiń oıymyz da, mindetimiz de ortaq. Sondyqtan aldymyzdaǵy maqsat-mindetterdi tize qosyp, birge asyrýymyz kerek dep esepteımin. Kún saıyn jumysymyzdyń qarqyny da, salmaǵy da arta túspek», - dedi Erlan Qoshanov.
Sonymen qatar ol zań shyǵarý máselesine de toqtaldy.
«Bizdiń negizgi jumysymyz - sapaly jáne naqty jumys isteıtin zańdardy qabyldaý. Prezıdent Qasym-Jomart Toqaev osy shaqyrylymnyń birinshi sesıasynda jańa Parlamenttiń aldynda turǵan mindetterdiń aýqymdylyǵyna toqtalǵan bolatyn. Onyń ishinde Memleket basshysy elimizdiń qarqyndy damýy úshin aldaǵy 5 jylda sapaly zańnamalyq negiz jasaýdy tapsyrdy. Bul úshin barlyq alǵyshart jasalǵan. Májiliske zań qabyldaý ókilettiligi búginde tolyq berildi. Endi júk te jaýapkershilik te bizge túsedi degen sóz. Sondyqtan depýtattar úılesimdi, tıimdi jáne júıeli jumys isteýi kerek», - dedi ol.
Palata tóraǵasy qazir Májiliste 50-ge jýyq zań jobasy qaralyp jatqanyn atap ótti.
«Memleket basshysynyń tapsyrmasy boıynsha jýyq arada taǵy da birqatar zań jobasy bizge kelip túsedi. Biz olardy tez ári sapaly túrde qabyldaýymyz kerek. Budan bólek, depýtattarda zań shyǵarýǵa bastamashy bolýǵa ókilettigimiz bar. Sol múmkindikti biz tolyq paıdalanýymyz kerek. Onyń ústine biz bárimiz óńirlerdi aralap keldik. Kóptegen depýtat sol óńirlerden qyzmet atqaryp keldi. Biz barlyq túıtkildi jaqsy bilemiz dep aıta alamyn. Ózekti máselelerdi de biz jaqsy bilemiz. Sondyqtan depýtattar belsendiligin barynsha arttyryp, osy máselelerdi zańnamalyq túrde retteýge at salysady dep oılaımyn», - dedi Májilis spıkeri.