Ekonomıkalyq odaq
Májilistiń jalpy otyrysynda «2014 jylǵy 29 mamyrdaǵy Eýrazıalyq ekonomıkalyq odaq týraly shartqa Eýrazıalyq ekonomıkalyq komısıanyń kadr quramyn qalyptastyrý tetigin naqtylaý bóligine ózgerister engizý týraly hattamany ratıfıkasıalaý týraly» zań jobasy maquldandy, dep habarlaıdy Almaty-akshamy.kz QazAqparat-qa silteme jasap.
«Zań jobasynda Eýrazıalyq ekonomıkalyq komısıasy laýazymdy tulǵalarynyń eńbek sharttarynyń merzimin ózgertý, múshe memlekettiń komısıaǵa jumys isteýge túsýge nıet bildirgen kandıdattardy ulttyq irikteýdi júrgizý múmkindigi, qyzmetkerlerdi merzimi shektelmegen ýaqyttan 5 jyldyq kelisimsharttarǵa aýystyrý, sondaı-aq jumys istep júrgen qyzmetkerlerdi ótpeli merzimderge aýystyrý bóliginde Eýrazıalyq ekonomıkalyq odaq týraly shartqa túzetýler kózdelgen», - dedi QR Premer-Mınıstri orynbasary - Saýda jáne ıntegrasıa mınıstriniń mindetin atqarýshy Serik Jumanǵarın.
Onyń aıtýynsha, komısıanyń laýazymdy adamdarymen (departament dırektorlary men olardyń orynbasarlary) jasalatyn eńbek sharttarynyń merzimin 4 jyldan bastap komısıa alqasynyń jumys merziminen aspaıtyn merzimge ózgertý eskerilgen. Qazirgi kezde komısıanyń laýazymdy qyzmetkerleriniń jumys kezeńi komısıa alqasynyń kezekti quramynyń jumys kezeńine baılanystyrylmaǵan.
«Bul jaǵdaı 4 jyldyq kelisimshart merziminiń aıaqtalýyna baılanysty dırektor nemese dırektorlardyń orynbasarlary komısıa alqasynyń jańa múshesiniń aldyna qoıǵan mindetterin oryndaýǵa úlgermegen kezde, komısıanyń jumysynda qıyndyqtar týǵyzady. Bul rette jańa laýazymdy tulǵalardy taǵaıyndaý, sondaı-aq buryn júrgizilgen jumysqa tolyqqandy tartý belgili bir ýaqytty alady. Osy norma komısıa alqasynyń jańa quramynyń kelýimen komısıanyń laýazymdyq deńgeıin bir mezgilde jańartýǵa múmkindik beredi» - dedi mınıstrdiń mindetin atqarýshy.
Onyń sózine qaraǵanda, komısıa qyzmetkerlerin merzimsiz eńbek sharttarynan 5 jyldyq shartqa aýystyrý qarastyrylǵan. Bul turǵyda atestattaý nátıjelerin eskere otyryp, alqanyń jetekshilik etetin múshesiniń usynýy boıynsha atalǵan merzimdi uzartý múmkindigi bolady.
«Qazirgi kezde komısıa qyzmetkerleriniń eńbek sharttarynda komısıadaǵy eńbek qyzmetiniń kelisimshartyn aıaqtaýdyń qandaı da bir merzimderi kózdelmegen. Osy normany iske asyrý komısıanyń kadrlyq quramyn jańartýǵa, onyń ishinde Qazaqstannyń ókildigin kúsheıtýge, sondaı-aq Qazaqstan ókilderin komısıada rotasıalaýdy júrgizýge múmkindik beredi», - dedi Serik Jumanǵarın.
Onyń paıymynsha, zań jobasyn qabyldaý teris áleýmettik-ekonomıkalyq nemese quqyqtyq saldarǵa ákep soqtyrmaıdy jáne respýblıkalyq búdjetten qosymsha qarajat bólýdi talap etpeıdi.