Parlament Májilisiniń depýtaty Mádı Ahmetov Qazaqstan Respýblıkasy İİM M.Esbolatov atyndaǵy Almaty akademıasynyń profesorlyq-oqytýshylar quramymen jáne tyńdaýshylarmen kezdesip, oqý ornynyń tynys-tirshiligimen tanysty.
Akademıa basshysynyń orynbasary S.Kenenbaev Májilis depýtatyna jańartylǵan oqý kabınetterin, kompúterlik synyptardy, akt zalyn kórsetip, tájirıbelik-baǵdarly oqytý baǵdarlamalaryn engizý jónindegi jumystarmen tanystyrdy. Sondaı-aq, ol bilim ordasyndaǵy kıberortalyqtyqtyń jumysymen jáne general Rústem Qaıdarov atyndaǵy kabınetpen tanysyp, Halyq qaharmany Ǵazız Baıtasovtyń taqtasyna gúl shoǵyn qoıdy, dep habarlaıdy Almaty-akshamy.kz Polisia.kz-ke silteme jasap.
Depýtat M.Ahmetov akademıa kýrsanttary men tyńdaýshylary turatyn kazarmaǵa da kelip, olardyń turmystyq jaǵdaıymen tanysty. Kýrsanttardyń ómirimen tanystyrý petank oınaýǵa arnalǵan ashyq alań men demalys aleıasynda jalǵasty. Akademıa klýbynda jeke qurammen kezdesýde túıtkildi máselelerdi sheshýge qatysty pikir almasýǵa basa nazar aýdaryldy. Qazaqstan Respýblıkasy Parlamenti Májilisiniń depýtaty Mádı Ahmetov óz sózinde Almatydaǵy qańtar oqıǵasy kezindegi lańkestik áreketterdi toqtatýǵa atsalysqan ujymǵa alǵys aıtyp, oqý ornynyń kıberqaýipsizdik salasyndaǵy mamandar men İshki ister mınıstrliginiń joǵary basshy kadrlaryn daıarlaý jumysynyń mańyzdylyǵyn atap ótti.
Sondaı-aq, M.Ahmetov Memleket basshysy alǵa qoıǵan mindetter turǵysynda saılanbaly organnyń qyzmeti, zań shyǵarý bastamalary, Áleýmettik kodeksti ázirleý jáne basqa da basym máseleler týraly habardar etti.
Elimizdiń quqyq qorǵaý júıesinde júrgizilip jatqan reformaǵa, sybaılas jemqorlyqqa qarsy kúreske, qyzmet kórsetýdiń jańa úlgisi aıasynda ishki ister organdaryn jańǵyrtýǵa qatysty máseleler týraly oıyn ortaǵa saldy. Kezdesýge qatysýshylar akademıa qyzmetkerleri úshin tıimdi áleýmettik paket qurýǵa, ıaǵnı turǵyn úı jaldaý ótemaqysyn tóleýge, jalpy, olardyń eńbegin materıaldyq yntalandyrýǵa qatysty túıtkildi máselelerdi talqylady.
Jeke quramnyń barlyq ótinishterin tyńdaǵan Májilis depýtaty akademıanyń materıaldyq-tehnıkalyq bazasyn jaqsartýdyń naqty máselelerin sheshýge yqpal etýge, onyń ishinde áleýmettik blok pen jabdyqqa qatysty eń ózektilerin baqylaýǵa alýǵa ýáde berdi.