Majar stýdentteri Abaıdyń «Kózimniń qarasy» jáne «Óleń - sózdiń patshasy» shyǵarmalaryn majar jáne qazaq tilderinde oryndady.
Qazaqstan táýelsizdiginiń 30 jyldyǵy aıasynda Majarstannyń Memlekettik jınalysy spıkeriniń orynbasary Shandor Lejaktyń qoldaýymen Lakıtelek halyq ınstıtýtynda qazaq aqyny jáne aǵartýshysy Abaı músininiń saltanatty ashylý rásimi ótti, dep habarlaıdy Almaty-akshamy.kz QazAqparatqa silteme jasap.
Majarstannyń saıası qaıratkerleri, akademıalyq jáne qoǵamdyq toptarynyń ókilderi qatysqan rásim barysynda Sh. Lejak kórnekti aqyn jáne oıshyl Abaıdyń shyǵarmashylyq murasy batys jáne shyǵys mádenıetin rýhanı baılanystyratynyn aıtty.
Majarstan Premer-mınıstriniń orynbasary – Qarjy mınıstri, Ekonomıkalyq yntymaqtastyq jónindegi Qazaqstan-Majarstan úkimetaralyq komısıasynyń teń tóraǵasy Mıhaı Varga Majarstan Úkimeti «Shyǵysqa tereze» syrtqy saıası strategıasy sheńberinde ǵylymı-mádenı mura salasyndaǵy eki el arasyndaǵy qatynastaryn damytýdy jalǵastyratynyn atap ótti.
Qazaqstan Elshisi Jánibek Ábdirashov Abaıdyń eńbekteri elder men halyqtardyń jaqyndasýyna septigin tıgizetinin, al onyń rýhanı murasy arqyly majar jastary qazaq dalasynyń mádenıetimen tanysa alatynyn jetkizdi.
İs-shara aıasynda majar stýdentteri Abaıdyń «Kózimniń qarasy» jáne «Óleń - sózdiń patshasy» shyǵarmalaryn majar jáne qazaq tilderinde oryndady. Sonymen birge elshiniń qazaq tili men Qazaqstan mádenıetin oqyp jatqan majar stýdentterimen kezdesýi ótti. Abaı músini Majarstannyń rýhanı ortalyqtarynyń biri sanalatyn Lakıtelek halyq ınstıtýtynyń baǵynda ornatylǵan.
Qazirgi ýaqytta ınstıtýt álemdik tilder men mádenıetterdi zertteýge arnalǵan biregeı joba qurdy, majar jastary arasynda keńinen tanymal boldy. Qazaqstan, Reseı, Belarýs jáne Mońǵolıadan kelgen jetekshi sheteldik ǵalymdardyń, lıngvıserdiń, mádenıettanýshylardyń jáne basqa da mamandardyń osy elderdiń mádenıeti men tarıhyn zerdeleý boıynsha stýdentterge arnalǵan oqytý is-sharalaryn ótkizý jónindegi jobaǵa qatysýy yqpal etedi.