Qazaqstandyq tanymal opera ánshisi Maıra Muhamedqyzy óner salasyndaǵy eńbegi eskerilmeı, áli kúnge deıin «Halyq ártisi» ataǵyn ala almaı júrgenine ókinishin bildirdi, dep habarlaıdy almaty-akshamy.kz.
Óner ıesi óziniń eńbegi shetelde kóbirek baǵalanyp, laıyqty qurmet kórsetilip jatqanyn atap ótti.
«Men Astana Shabyt akademıasynda bes jyl vokaldan sabaq berip, shákirtterim halyqaralyq júldeler alyp, jeńispen oralǵanda eńbegimdi eshkim baǵalaǵan emes. Sondaǵy alǵan jalaqy 17,000 teńgemen baǵalanypty. Kúlkim keledi oılasam. Qaıran ýaqyt pen sarqylǵan qýatyń de! Al Qyrǵyz baýyrlar Qyrǵyzstan ulttyq konservatorıasynyń profesory ataǵyn baıaǵyda berip qoıǵan», - deıdi óner ıesi.
Ánshini sheteldegi sahnalarda «Halyq ártisi» dep shaqyratyn bolǵan. Alaıda, ol óziniń bul ataqty áli kúnge deıin ala almaǵanyn jetkizdi.
«Al bizdegi ataq jaıly oılaýdyń ózi janyńa batady. Halyq ártisi ataǵy jańǵyrǵan byltyrǵy marapatta maǵan nege berilmegenin aıtpaı-aq qoıaıyn. Eńbegimdi Qazaqqa dáleldeı almaı, baǵalata almaı jarty ǵasyr ómir ótip barady. «Ómirińiz alda» deıtinderge aıtarym: Atańnyń basy! Osyndaı halyqaralyq is-sharalarda meni “QR halyq ártisi” dep jarıalaǵanda betimnen ot shyǵyp, kóńil kúıim buzylady. Bireýler aıtqandaı: Sertıfıkaty joq halyq artısisiń degende júrgizýshige júgirip baryp «Ótinemin. Jaı ǵana Soprano-Maıra Muhamedqyzy, Qazaqstan» dep aıtyńyzshy» deımin. E, bir kem dúnıe, de!», - dep qapalanady ánshi.
Ol jas kúninde shetelge ketpeı, elge oralǵanyn atap ótti.
«Bárin aıt ta birin aıt, Larısa Georgıevamen 30 jyldan soń kezdesken bul kesh talaı ótkendi eske saldy. 1995 jyly Halyqaralyq Rımskıı-Korsakov konkýrsyna qatysqan kezimde Larısa apam meni Marınskıı teatrǵa qalsańyzshy, Valerıı Georgıev jańa dırektor boldy. Talantty jas ánshilerdi qoldaıdy degen usynysyna oryssha bilmegenim úshin júreksinip, raqmetimdi aıtyp, elge oralǵan bolatynmyn. Keshe apam sony aıtyp «Al endi ne boldy?! Sen sol kezde meni tyńdaǵanyńda osy kúni qaı jerde júrer ediń?» demes pe, jastyq shaqta istegen qatemdi endi túsindim, «Bul taǵdyr, Maestro» degennen basqa sóz tappadym. Iá, taǵdyr óz qolyńda! Qasyńda júrgen durys jol siltep aqyl aıtatyn adam ustazyń bolsyn degim keledi jastarǵa!»
Aıta keteıik, Maıra Muhamedqyzy 1965 jyldyń 5 qyrkúıeginde Qytaıdyń Qulja qalasynda dúnıege kelgen. Ol Qazaqstan Respýblıkasynyń Eńbek sińirgen ártisi, Memlekettik syılyqtyń laýreaty atanǵan. Parıjdegi "Grand Operada" Qazaqstannyń atynan óner kórsetken tuńǵysh ári ázirge jalǵyz opera ánshisi.