Áıel kásipkerlerge arnalǵan jańa «Úmit» baǵdarlamasy iske qosyldy. «Damý» kásipkerlikti damytý qory» AQ áıelderdiń bıznesin qarjylandyrýǵa 10 mıllıard teńge bóldi. Bul bastama áıel kásipkerlerge bıznesti damytýǵa keń múmkindikter usynady, dep habarlaıdy almaty-akshamy.kz
«Úmit» baǵdarlamasy aıasynda Qazaqstannyń barlyq óńirleri, sonyń ishinde aýyldar, shaǵyn jáne mono qalalardaǵy kásipker áıelder ekinshi deńgeıli bankter arqyly nesıe ala alady. Investısıa jáne aınalym qarajatyn tolyqtyrýǵa beriletin nesıeniń maksımal merzimi – 84 aıǵa deıin, shekti somasy 100 mıllıon teńge.
Baǵdarlama ekonomıkanyń barlyq sektorlaryn qamtıdy, tek qarjy jáne saqtandyrý salasy, jyljymaıtyn múlikpen jasalatyn operasıalar jáne kóterme-bólshek saýda ǵana kirmeıdi.
Sonymen qatar, baǵdarlama aıasynda «Damý» Qory Eýropa qaıta qurý jáne damý bankimen (EBRD) áriptestigi aıasynda tegin oqý kýrstary men trenıńter usynady. Bul halyqaralyq uıymmen birlesken baǵdarlama kásipker áıelderge bıznesti basqarý jáne naryqtaǵy tabysty básekelestik úshin qajetti kásibı mashyq, bilim men quraldarǵa ıe bolýǵa múmkindik beredi.
«Damý» Qorynyń Basqarma tóraıymy Gaýhar Býrıbaeva atap ótkendeı, «Úkimet Qazaqstandaǵy shaǵyn jáne orta bıznesti, onyń ishinde áıelder kásipkerligin damytýǵa kóp kóńil bóledi. Shaǵyn jáne orta bıznes ıeleri qurylymyndaǵy áıel kásipkerlerdiń úlesi «Damý» Qory qoldaǵan jobalardyń jalpy sanynyń 47%-yna jetti. Qor jumys isteı bastaǵan ýaqyttan beri áıel kásipkerlerdiń 96 myń jobasyna 2 893 mlrd teńge somasynda qoldaý kórsetti. Bıznestegi arýlar bıznes-ıdeıalaryn júzege asyrý, kompanıasyn damytý men jańa jumys oryndaryn ashý úshin berilgen memlekettik qoldaýdy tıimdi paıdalanatyny qýantady», - dep málimdedi.
«Damý» Qory – Qazaqstanda shaǵyn jáne orta bıznesti damytýdy kózdeıtin memlekettik qoldaý quraldaryn júzege asyratyn qarjy agenttigi. Qordyń jalǵyz aksıoneri – «Báıterek» ulttyq basqarýshy holdıńi» AQ.