Magıstratýraǵa túsý úshin keshendi testileýge qatysýǵa ótinishter qabyldaý bastaldy.
Tirkeý QR BǴM Ulttyq testileý ortalyǵynyń app.testcenter.kz saıtynda 15 shildege deıin júrgiziledi, dep habarlaıdy Almaty-akshamy.kz QazAqparatqa silteme jasap.
Úmitkerler bilim berý baǵdarlamalary toby, testileýdi ótkizý tili men ornyna ótinimderdi qabyldaý merzimi aıaqtalǵanǵa deıin ózgerister engize alady. Testileý kúni týraly aqparatty úmitker jeke kabınetinen alady. Al, keshendi testileý 20 shildede bastalyp, 10 tamyzǵa deıin jalǵasady.
Belgili bir bilim berý baǵdarlamasyna qujattardy tapsyrar aldynda talapkerler ýnıversıtettiń qabyldaý komısıasymen keshendi testileýdiń formaty jáne tańdalǵan bilim berý baǵdarlamasy tobynyń mamandyǵyna sáıkestigi týraly keńesýi qajet. Keńesti ýnıversıtettiń vırtýaldy qabyldaý komısıasynan da alýǵa bolady. 2022-2023 oqý jylyna arnalǵan magıstratýraǵa 13 myńnan astam grant bólingen. Ǵylymı-pedagogıkalyq magıstratýraǵa túsý úshin shekti bal – 75, mamandandyrylǵan magıstratýraǵa – 50 bal.
«Keshendi testileý elektrondy formatta ótkiziledi jáne úsh bólikten turady: shet tili, oqýǵa daıyndyqty anyqtaý jáne bilim berý baǵdarlamalary tobynyń beıini boıynsha test. Oǵan 4 saǵat beriledi. Shet tilin bilý deńgeıin rastaıtyn halyqaralyq sertıfıkattary bolsa, úmitkerler shet tilinen test tapsyrýdan bosatylady», - dep túsindirdi QR BǴM Ulttyq testileý ortalyǵynyń dırektory Rýslan Emelbaev.
Keshendi testileý nátıjelerimen kelispegen jaǵdaıda, úmitkerler testileýden ótkennen keıin onlaın apelásıaǵa bere alady.