Búgin magıstratýraǵa bilim granttaryn taǵaıyndaý konkýrsyna qatysý úshin qujattar qabyldaý bastaldy. Ol 15 tamyzǵa deıin (qosa alǵanda) joǵary oqý oryndarynyń qabyldaý komısıalary, onyń ishinde vırtýaldy qabyldaý komısıalary arqyly júzege asyrylady.
Barlyǵy 39 myńnan astam adam magıstratýraǵa túsý úshin emtıhan tapsyrdy. Oqýǵa túsýshilerdiń 43%-y shekti bal jınady. Olar grant konkýrsyna qatysa alady.
Magıstratýrada oqýǵa arnalǵan bilim berý granttary keshendi testileý nátıjeleri boıynsha konkýrstyq negizde taǵaıyndalady.
Grant konkýrsyna qujattardy qabyldaý 12-15 tamyz aralyǵynda joo-lardyń qabyldaý komısıalary, onyń ishinde onlaın vırtýaldy komısıalar arqyly júzege asyrylady. Iaǵnı, bolashaq magıstranttar qujattaryn dástúrli jáne onlaın formatta tapsyra alady.
Konkýrsqa qatysý úshin kelesi qujattardy tapsyrý qajet: jeke kýáliktiń kóshirmesi, joǵary bilimi týraly qujat (dıplom jáne qosymshasy); KT sertıfıkaty jáne shet tilin meńgergendigin rastaıtyn halyqaralyq sertıfıkattar (bar bolǵan jaǵdaıda). 075/ý nysanyndaǵy medısınalyq anyqtamany joǵary oqý ornyna túskende tapsyrady.
Qujattardy tapsyrý kezinde oqýǵa túsýshi bilim berý baǵdarlamalarynyń bir tobyn jáne úsh joǵary oqý ornyn kórsete alady.
Magıstratýraǵa túsýshiler 13 myń memlekettik bilim grantyna úmitker bola alady.
Magıstratýraǵa bilim berý granty ıegerleriniń tizimi 26 tamyzǵa deıin QR Ǵylym jáne joǵary bilim mınıstrligi men Ulttyq testileý ortalyǵynyń resmı saıtynda jáne áleýmettik jelilerinde jarıalanady.
Bolashaq magıstranttardyń oqýǵa qabyldanýy 28 tamyzǵa deıin aıaqtalady.