Atalǵan zańda jazýshynyń mártebesi de anyqtalmaǵan.
Jazýshylar odaǵy tóraǵasynyń orynbasary Aqberen Elgezek qoldanystaǵy «Mádenıet týraly» zańda kórkem ádebıet týraly naqty taraý joq ekenin, jazýshynyń mártebesi de anyqtalmaǵanyn aıtady, dep habarlaıdy Almaty-akshamy.kz
«Zańda teatrlar men kitaphana týraly taraýlar bar, tipti kıno salasynda arnaıy zań qabyldadyq. Onyń bári kerek, bári durys. Biraq osy teatr men kınonyń negizinde qandaı dúnıe jatyr? Ol, árıne, ádebıet. Ádebıet bolmasa, kıno men teatr qoıylymy qaıdan shyqsyn? Kitaphana týraly taraý bar, biraq sol kitaphana sórelerinde ádebı kitaptar turǵan joq pa?» - dedi Aqberen Elgezek elordada Mádenıet jáne sport mınıstrliginiń alqa májilisinde.
Onyń aıtýynsha, zańda ádebıet týraly janama ǵana aıtylady.
«Mysaly, qoǵamdyq mańyzdy ádebıet týraly taraý bar jáne ol taraýda ol ádebıetti shyǵaryp basý men taratý týraly bulyńǵyr ereje bar. Al naqty kórkem ádebıet týraly taraý joq. Nege biz qazaqtyń kórkem ádebıet degen sózinen qashamyz, sony qalamgerler qaýymy túsinbeıdi. Atalǵan zańda jazýshynyń mártebesi de anyqtalmaǵan. Shyǵarmashylyq qyzmetker degen sóz bar, biraq onyń qoǵamdyq orny men róli naqty aıtylmaǵan. Bizdiń oıymyzsha, aldaǵy ýaqytta atalǵan zańda kórkem ádebıet týraly, jazýshynyń mártebesi men onyń gonorar joldaryn anyqtaıtyn erejeleri bar bólek taraý engizý qajet. Oǵan saıası erik-jiger bolsa, osy taraýdy jasaqtaıtyn jumys tobyna qatysyp, kómektesýge daıarmyz», - dedi Aqberen Elgezek.