Mádenıet jáne sport salasy qyzmetkerlerine memlekettik nagradalar tabystaldy. Bul týraly Almaty-akshamy.kz Inform.kz-ke silteme jasap habarlaıdy.
Prezıdent Qasym-Jomart Toqaevtyń Jarlyǵyna sáıkes Sensitive nashar estıtin bıshiler teatrynyń kórkemdik jetekshisi Olga Rostovshıkova «Qurmet» ordenimen marapattaldy. Nagradany Ulttyq mereke qarsańynda Mádenıet jáne sport mınıstri Dáýren Abaev tabystady.
Esterińizge sala keteıik, Olga Rostovshıkovanyń jetekshiligimen estý jáne sóıleý qabileti nashar, erekshe artıser AQSH-taǵy XXV dúnıejúzilik óner chempıonatynyń gran-prıin jeńip alǵan edi. 72 el qatysqan jarysta jerlesterimiz úzdik atandy.
Sonymen qatar, Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń jeńil atletıka (sýrdo) boıynsha sportshysy Farhad Qystaýbaev, Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń grek-rım kúresi boıynsha bas jattyqtyrýshysy Shonhý Haırataan, erkin kúresten belgili jattyqtyrýshy, eńbek ardageri Amanjol Buǵybaev, eńbek ardageri Ermek Júsipov, belgili músinshi, eńbek ardageri Asqar Nartov, eńbek ardageri Rysty Sarıeva jáne Qazaq ulttyq óner ýnıversıtetiniń profesory Aıtjan Toqtaǵan «Qurmet» ordenimen marapattaldy.
Memleket basshysynyń Jarlyǵymen «Eren eńbegi úshin» medalimen Baıanaýyl memlekettik ulttyq tabıǵı parkiniń ekskýrsıa jónindegi nusqaýshysy-memlekettik ınspektory Altynbek Qurmanov, Qazaq ulttyq horeografıa akademıasynyń profesory Gúlnar Saıtova, Abaı atyndaǵy teatr artısi Rysbúbi Tóleýhanova, ónertanýshy Shaızada Toqtabaeva jáne «Astana» KQK bas atqarýshy dırektory Tastanbek Esentaev marapattaldy.
Saltanatty rásim barysynda mádenıet, sport, týrızm jáne arhıv qymetkerlerine «Shapaǵat» medali tabystaldy, mádenıet salasyndaǵy erekshe jetistikteri men Qazaqstan Respýblıkasyna sińirgen erekshe eńbegi úshin «Qazaqstannyń eńbek sińirgen qaıratkeri» qurmetti ataǵy taǵaıyndaldy, Qazaqstan Respýblıkasynyń Qurmet gramotasy jáne Qazaqstan Respýblıkasy Prezıdentiniń Alǵysymen marapattaldy.
