Erteń Almaty mýzeıinde 18 mamyr – Halyqaralyq mýzeıler kúni aıasynda kórnekti memleket jáne qoǵam qaıratkeri, etnograf-ǵalym Ózbekáli Jánibekovtiń ómiri men qyzmetine arnalǵan «Mádenı maıdan» atty kórme ashylady, dep habarlaıdy Almaty-akshamy.kz
Kórmede Ó.Jánibekovtiń otbasynan alynǵan fotolar, arhıvtik qujattar, eńbekteri men marapattary, kıimderi, jeke zattary, qoljazbalary, eskızderi, Almaty mýzeıi qorynan Ó.Jánibekovtiń úlgisi boıynsha tigilgen «Sazgen sazy» ansambliniń alǵashqy oryndaýshysynyń sahnalyq kıimi, fotosýretteri, mýzykalyq aspaptar men Áziret Sultan Memlekettik tarıhı-mádenı mýzeı qoryǵynyń qorynan Ó.Jánibekovtiń jeke zattary jáne t.b. usynylady.
Ó.Jánibekovtiń bastamasymen elimizde júzge jýyq mýzeı men etnografıalyq zaldar ashylyp, «Sazgen sazy», «Sherter», «Adyrna», «Altynaı» fólklorlyq-etnografıalyq, án-bı ansámblderi, teatrlar, «Kazrestavrasıa», «Biregeı ysqymen oınalatyn mýzykalyq aspaptardyń memlekettik koleksıasy» quryldy. Sondaı-aq, Ó.Jánibekovtiń arqasynda Uly dalanyń birqatar eskertkishteri saqtaldy. Qalpyna keltirilgen eskertkishterdiń qatarynda Qoja Ahmet Iassaýı, Tájik, Qarahan, Aısha-bıbi, Aq-uıyq jáne Babadja-Hatýn keseneleri men Jarkent meshiti jáne Otyrar arheologıalyq eskertkishteri bar.
Ó. Jánibekovtiń tikeleı yqpalymen qazaqtyń tól meıramy Naýryz qaıta jandanyp, qasıetti Taıqazan Qazaqstanǵa qaıtaryldy.
A.Baıtursynuly, M.Jumabaıuly, M.Dýlatuly, J.Aımaýytuly, Sh.Qudaıberdiulynyń isterin qaıta qaraý komısıany qurýdyń bastamashysy boldy. Nátıjesinde Alash zıalylarynyń dańqty esimderi qaıta tirildi.
Kórmeniń saltanatty ashylýynda Ó.Jánibekovtiń zamandastary, qyzmettes bolǵan áriptesteri, shákirtteri men urpaqtary qatysyp, estelikterimen bólisedi.