Taǵy bir qaýipti kesel – lýdomanıa, ıaǵnı qumarpazdyq. Keıbir málimetterge qarasaq, 400 myńǵa jýyq azamat – býkmekerlik keńseler men kazınolardyń turaqty klıenti. Bul – tutas bir qalanyń halyq sanyna para-par kórsetkish, dedi Memleket basshysy Qasym-Jomart Toqaev Ulttyq quryltaıdyń úshinshi otyrysyndaǵy sózinde.
Shyn máninde, lýdomanıa – beıbit kúnde eldiń shyrqyn buzyp jatqan qater. Sonyń kesirinen talaı shańyraq shaıqaldy. Talaı azamat zań buzyp, qylmysqa uryndy. Qumar oıyn úshin qaryzǵa batyp, ózine qol jumsaǵan jandar týraly habarlar, ókinishke qaraı, kún saıyn tarap jatady. Bul dert jas urpaqqa óte úlken zıan keltiredi. Onlaın-oıyndar balalardyń kúndelikti ermegine aınalyp barady. Quzyrly organdar byltyr ınternet-kazınonyń belgisi bar 4 myńnan astam saıtty buǵattady – dedi Prezıdent.
Ol nashaqorlyqqa jáne esirtki bıznesine qarsy kúresý úshin keshendi jospar qabyldanǵanyn atap ótti. Úkimet lýdomanıamen kúreske qatysty dál sondaı jospar qabyldaýy kerek. Qumarpazdyqqa zań júzinde shekteý qoıý qajet. «Amanat» partıasy fraksıasynyń bastamasymen osy másele boıynsha tıisti zań jobasy ázirlendi. Parlamentte qaralyp jatqan sol jobany osy sesıanyń sońyna deıin qabyldaý qajet. Biz jastardyń qumar oıynǵa salynyp, arzan tabysqa umtylýyna jol bermeýimiz kerek. Adal eńbekpen tapqan tabys qana berekeli bolady – dedi Memleket basshysy.