Respýblıka kúni Tumandy Albıon tórinde de toılandy.
Londonda ýaqytsha turyp jatqan qazaqstandyqtar ortalyq alańǵa shyǵyp, fleshmob uıymdastyrdy, dep Almaty-akshamy.kz QazAqparatqa silteme jasap.
Ulybrıtanıanyń ortalyǵynda ornalasqan álemge áıgili Trafalgar alańyna bir top otandasymyz jınalyp, olardyń aldynda Qazaqstan Respýblıkasynyń eńbek sińirgen qaıratkeri Erlan Rysqalı jyrdan shashý shashty. Ol Muqaǵalı Maqataev pen Bákir Tájibaevtyń óleńderine órilgen «Qazaǵym-aı», «Aýylym» ánderin naqyshyna keltirip oryndady. Dástúrli án ónerimizdiń kóshin órge súırep júrgen ánshi ultymyzdyń baı mádenıetin shetelde nasıhattaý mańyzdy ekenin aıtady.
«Maqsatymyz - qazaqtyń ánin, dástúrin, dombyrasyn jáne ulttyq kıimin sheteldikter aldynda pash etý. Respýblıka kúninde álemdi aýzyna qaratyp otyrǵan Ulybrıtanıa sıaqty uly memlekettiń astanasynda dástúrli ónerimizdiń saltanat qurýy úlken jetistik dep bilemin», - deıdi Erlan Rysqalı.
Ulybrıtanıa - týrızm boıynsha dúnıejúzinde onynshy oryn alatyn memleket. Jyl saıyn bul jaqqa álemniń túkpir-túkpirinen 40 mıllıonǵa jýyq adam qydyryp keledi. Pandemıa basylǵaly olardyń sany arta tústi. Bul joly Londonnyń kórneki oryndaryn aralap júrgen saıahatshylar fleshmob qatysýshylarymen tanysyp, qazaq ónerinen sýsyndaýǵa múmkindik aldy.
«Men Amerıkadan Ulybrıtanıaǵa qydyryp keldim. Qazaqstanda Respýblıka kúni toılanyp jatqanyn estip, qýandym. Biz sizderge baqyt pen baılyq, densaýlyq pen mahabbat tileımiz. Respýblıka kúni qutty bolsyn!» - deıdi Amanda Boıl esimdi týrıs.
«Trafalgar alańynda ulttyq kıimderińizdi kórip, dástúrli ánderińizdi tyńdap rıza bolyp jatyrmyz. Biz Anglıanyń jergilikti turǵyndarymyz. Merekemen quttyqtaımyz!» - deıdi Margaret Smıt.
Fleshmob qatysýshylary - Ulybrıtanıada jumys babymen júrgen nemese bilim alyp jatqan otandastarymyz. Respýblıka kúnin Qazaqstanda merekeleý múmkin bolmaǵandyqtan, Tumandy Albıon tórinde toılaýdy uıǵarypty. Ústerinde shapan men qamzol, qoldarynda dombyra men jalaý. Olar balalaryn da ertip kelip, Ánurandy bári birge oryndady.
«Londonǵa qydyryp keldim. Bir jaǵynan, aǵylshyn tilin úırený maqsatym edi. Qazaq baýyrlarymnyń osynda toılap jatqanyn estip keldim. Shyn júrekten qýanyp jatyrmyn. Elimiz tynysh, jurtymyz aman bolsyn!» - deıdi otandasymyz Arman Kúmisbaı.
Ulybrıtanıa - 70 mıllıonǵa jýyq adam turatyn alyp memleket. Negizgi halqyn aǵylshyn, shotland, ýels jáne ırland ulttary quraıdy. Olardan bólek úndilik, pákistandyq, aýǵanstandyq jáne basqa da ımıgranttardyń urpaqtary tatý-tátti ómir súredi. Barlyǵynyń ádet-ǵuryptary men salt–dástúrleriniń saqtalýyna jáne merekelerin keń kólemde atap ótýine jaǵdaı jasalǵan. Qazaqstandyqtar bıyl qaıta túlegen Respýblıka kúnin aldaǵy ýaqytta budan da keń kólemde toılaýdy josparlap otyr.