Lombardtan alǵan qaryz nesıe nemese ıpoteka alýǵa kedergi bolmaıdy.
Alaıda olardyń maquldanýyna áser etedi, dep habarlaıdy aqshamnews.kz
Sebebi lombard aldyndaǵy qaryz jalpy qaryzdyq júktemeni esepteý kezinde esepke alynady.
Qazaqstandyqtar ıpotekalyq nemese basqa nesıe alýǵa ótinish bergende, bank onyń qarjylyq jaǵdaıyn jáne qaryzdaryn tóleýge qabiletin tekseredi. Oǵan qaryz alýshynyń basqa da mindettemeleri kiredi. Mysaly, nesıeler, alıment, aıyppuldar nemese basqa da qaryz.
Eger qaryz alýshy óziniń tólem qabiletin dáleldeı alsa, aǵymdaǵy qaryzyn ótese jáne qajetti qujattardy usynsa, ıpotekalyq nemese basqa nesıeni maquldaý yqtımaldyǵy aıtarlyqtaı artady. Osylaısha, lombard aldyndaǵy qaryz nesıe alýǵa kedergi bolmaıdy. Biraq ótinish berýshiniń ótelmegen nemese merzimi ótken bereshekteriniń bolýy nesıeni maquldaý yqtımaldyǵyn azaıtady.
İnbusiness.kz saıtynyń dereginshe, bul rette birneshe jaıtty eskerý qajet. Atap aıtqanda, lombardtar kredıttik búrolarǵa mıkrokredıtter týraly aqparatty berýge mindetti. Bul aqparat qaryz alýshynyń nesıe tarıhynyń bir bóligine aınalady jáne onyń nesıe boıynsha esebinde kórsetiledi.
Sonymen qatar, qaryzdy óteý merzimi ótken jaǵdaıda lombard qaryz ornyna qabyldap alǵan baǵaly buıymdy keminde taǵy 30 kún saqtaýǵa mindetti. Osy ýaqyt ótkennen keıin atalǵan buıymdy satýǵa quqyly. Kepilge salynǵan múlikti satý kezinde lombardtaǵy zattardy kepilge berý týraly shart buzylady, bul rette qaryz alýshynyń mindettemeleri joıylady.
Kepil zatty satý aktisi nemese ony lombardtyń menshigine aınaldyrý týraly sheshim jáne qaryzdy óteý týraly anyqtama sıaqty qujattar qaryzdyń toqtatylǵanyn rastaıdy.
Nesıelik esepte qamtylǵan aqparatpen kelispegen jaǵdaıda, qaryz alýshy aqparat berýshige (nesıe berýshige) nemese kredıttik búroǵa aqparatty daýlaý úshin júginýge quqyly. Ótinishte jeke tulǵanyń tegi, aty, ákesiniń aty, turǵylyqty jeri, jeke basyn kýálandyratyn qujattyń derektemeleri, málimetteri, sondaı-aq, kredıtordyń aty-jóni, ótinish berýshiniń nemese onyń ýákiletti ókiliniń qoly qoıylýy tıis. Ótinishke ótinish berýshi kórsetken bereshekti ótegendi rastaıtyn qujattardyń kóshirmeleri qosa berilýi tıis. Ótinishti qaraý merzimi kredıttik búroǵa kelip túsken kúnnen bastap 15 jumys kúnin quraıdy.
Kredıttik esepte málimetterdiń burmalanýy rastalǵan jaǵdaıda kredıtor derek anyqtalǵan kúnnen bastap 10 jumys kúni ishinde kredıttik búroǵa durys málimetterdi berýge tıis. Óz kezeginde nesıelik búro ótinish berýshige túzetilgen nesıelik esepti usynýǵa mindetti.