Bokstan Býsto-Arsısıo (Italıa) qalasyndaǵy álemdik irikteý týrnırindegi 6-shy jarys kúni 4 jerlesimizge de jeńis ońaıǵa soqpady.
Aldymen Parıj Olımpıadasynyń joldamasyn alýǵa ekinshi múmkindik alǵan 66 kelidegi Natalá Bogdanova alǵashqy aıqasyn Argentına sportshysy Lorena Soledad Balbýenaǵa qarsy ótkizip, 4:1 esebimen utty, dep habarlaıdy Almaty-akshamy.kz.
Sondaı-aq, kúndizgi sesıada 80 kelidegi álem chempıony Nurbek Oralbaı 1/16 fınalda qara kúshtiń ıesi, Togo memleketiniń sportshysy Preva Padabadıdi tehnıkalyq sheberligimen jeńdi.
Endi jerlesimizge 1/8 fınalda óte qıyn bolýy múmkin. Sebebi, onyń qarsylasy 2021 jylǵy álem chempıonatynyń kúmis júldegeri Alekseı Alfórov (AIN) bolady.
Keshki sesıada buǵan deıin eń jeńil salmaqta álem chempıonatynyń 2 márte júldesin alǵan Alýa Balqybekova jańa 50 keli salmaqta óner kórsetti.
28 jastaǵy jerlesimiz Chehıanyń jas boksshysy Klaýdıa Totovamen kezdesip, 3 raýnd boıy jekpe-jekti óz baqylaýynda ustady. Esep: 5:0
Al álem chempıony Mahmud Sabyrhan úshin 57 kelidegi ekinshi aıqasy óte qıynǵa soqty. Jerlesimiz 1/16 fınalda Saravýt Sýkzetten (Taıland) 3:2 esebimen ǵana basym tústi.
Alǵashqy raýndta qolynyń uzyndyǵyn paıdalanǵan Taıland sportshysy 3:2 esebimen basym túskenimen, qalǵan ýaqytta jerlesimiz qorǵanysqa kóńil bólip, jaqyn qashyqtyqta aılasyn asyryp ketti.
Qos boksshy byltyr 22 jasqa deıingi Azıa chempıonatynyń fınalynda jolyǵyp, Mahmud Sabyrhan jeńiske jetken edi.
Búgin áıelder 54, 60, 66, 75 kelide jekpe-jek ótkizse, erler 63,5, 92,+92 kelide sharshy alańǵa shyǵady.