27 qańtarda Lenıngradtyń fashıs basqynshylarynyń qorshaýynan azat etilgenine 80 jyl toldy. Bul tarıhı oqıǵany jyr alyby Jambyl Jabaev óziniń «Lenıngradtyq órenderim» atty jyrynda máńgilikke qaldyrǵan. Atalǵan qasiretti óz kózimen kórgenderdiń biri – otstavkadaǵy maıor, shekara ardageri Iýrıı Fedorovıch Nıkıforov.
Lenıngrad qorshaýynda bolǵan kúnderdi basynan keshirgen Iýrıı Fedorovıchpen kezdesý Almaty oblysy Qarasaı aýdany shekara qyzmetiniń sarbazdary úshin erekshe áserli boldy. Ardagermen kezdesý shekarashy ardagerlerdiń «Zastava tarlandary» respýblıkalyq qoǵamdyq birlestigi tóraǵasynyń orynbasary, Almaty oblysy boıynsha fılıalynyń basshysy, zapastaǵy polkovnık Dáýletqalı Mamyrhanovtyń basshylyǵymen uıymdastyryldy.
Kezdesý barysynda ardager Lenıngrad qorshaýyndaǵy qıyn kezeńder týraly jan tebirenterlik estelikterimen bólisti. Ol sol kezdegi qorshaýdaǵy ómirdi, ashtyqtan aman qalǵan balalyq shaǵyn eske aldy. Ákesi soǵystyń alǵashqy kúninde maıdanǵa attanyp, Vengrıada qaza tapsa, anasy qorshaýdaǵy qıynshylyqtan qaıtys bolǵanyn, al aǵasy ekeýin ájesiniń qalaı qutqaryp qalǵanyn aıtty.
Iýrıı Fedorovıch sývorovshylar mektebin aıaqtaǵan soń, áskerı baılanysshylardy daıarlaıtyn ýchılıshege túsip, Qazaqstanda shekara qyzmetinde uzaq jyldar qyzmet etti. Osy jyldarda ol Qazaq radıosynyń dıktory Muqaǵalı Maqataevpen tanysyp, onyń óleńderin tyńdaǵanyn erekshe maqtanyshpen áńgimeledi.
Kezdesý sońynda shekara qyzmetiniń bólim bastyǵy podpolkovnık Saǵadat Áýezov ardagerdiń taǵylymdy áńgimesi úshin alǵysyn bildirip, jas sarbazdarǵa aq jol tiledi.