88 jastaǵy ardager Áýezov aýdanynda turady.
Almapty qalasynyń VIII shaqyrylǵan máslıhatynyń kezekti XV sesıasynda «Lenıngrad qalasynyń kásiporyndarynda, mekemeleri men uıymdarynda blokada kezeńinde jumys istegen jáne «Lenıngradty qorǵaǵany úshin» medalimen nemese «Lenıngrad blokadasynyń turǵyny» tósbelgisimen nagradtalǵan Almaty qalasynda turatyn azamattarǵa Sankt-Peterbýrg qalasyna jol júrý shyǵyndaryn óteýge áleýmettik kómek týraly sheshimge ózgerister qabyldandy.
Qalalyq jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasovtyń aıtýynsha, Almatyda osy talaptarǵa saı keletin bir ǵana ardager turady.
Ózgerister memlekettik basqarý júıesin ortalyqsyzdandyrýmen jáne áleýmettik kómek kórsetý jónindegi fýnksıalardy Almaty qalasy aýdandarynyń ákimdikterine berýmen baılanysty.
«UOS ardagerleriniń Sankt-Peterbýrg qalasyna barýyn qamtamasyz etý boıynsha áleýmettik kómek kórsetý tártibin aıqyndaıtyn máslıhat sheshimine naqtylaý engizý qajet. Tıisti ózgeris tólemder ekinshi deńgeıdegi bankter ári aýdan ákimdikteri arqyly UOS ardageriniń shotyna tikeleı júrgiziletinin qarastyrady. Búginde bul Áýezov aýdany. Jalpy, qosymsha qarjy qajet emes, biz ortalyqsyzdandyrý sharalaryna sáıkes keltiremiz», - dep atap ótti basqarma basshysy.
«Almatyda jyl saıyn Sankt-Peterbýrgke baryp, týystarymen kezdesip, estelik oryndarda bolatyn bir ǵana ardager bar. Bul saparǵa shamamen 300 myń teńge bólinedi, tolyq kólemde tólenedi, qarajat qarastyrylǵan», - dep qorytyndylady sózin Baýyrjan Jaýbasov.