Qazaqstannyń Latvıadaǵy Elshiligi Latvıanyń Ekonomıka ınstıtýtymen birlese otyryp, Latvıa Ǵylym Akademıasynda Qazaqstan Respýblıkasy Táýelsizdiginiń 30 jyldyǵyna oraılastyrylǵan «Qazaqstandaǵy reformalar – nıetten is-áreketke» taqyrybynda dóńgelek ústel ótkizdi, dep habarlaıdy almaty-akshamy.kz «Habar 24» silteme jasap.
QR Syrtqy ister mınıstrliginiń habarlaýynsha, Qazaqstan Elshisi Tımýr Pirimbetov qazirgi ýaqytta elde Prezıdent Qasym-Jomart Toqaevtyń basshylyǵymen júrgizilip jatqan saıası jáne áleýmettik-ekonomıkalyq ózgerister týraly baıandama jasady. Aýdıtorıanyń nazary táýelsiz damýdyń úsh onjyldyǵy ishindegi memlekettiń negizgi jetistikterine aýdaryldy.
Dıplomattyń aıtýynsha, olardyń árqaısysy jas memlekettiń egemendigin, ulttyq ekonomıkasyn, ishki jáne syrtqy saıasatyn, halyqaralyq bedelin nyǵaıtýda mańyzdy kezeńge aınaldy. Tuńǵysh Prezıdent N. Á. Nazarbaevtyń eldiń qalyptasýy men búkil álemde tanylǵan memlekettik qurylystyń qazaqstandyq modelin qalyptastyrýdaǵy negizgi róli atap ótildi.
Dóńgelek ústel jumysyna Latvıa Seıminiń birqatar depýtattary qatysty. Atap ótkende, Ýldıs Aýgýlıs – «Jasyldar men Sharýalar odaǵy» parlamenttik fraksıasynyń basshysy jáne Qazaqstan Parlamentimen yntymaqtastyq jónindegi toptyń jetekshisi, Armand Kraýze – Syrtqy ister jónindegi parlamenttik komıtettiń múshesi, Lúbov Shevsova – Qazaqstan Parlamentimen yntymaqtastyq jónindegi top basshysynyń orynbasary, sondaı-aq Ieva Sılına – Latvıa Prezıdentiniń Ǵylym jáne bilim jónindegi keńesshisi, akademık Baıba Rıvja – Latvıa ǵylym akademıasy tóralqasynyń múshesi, Ianıs Vanags – Ekonomıka ınstıtýtynyń jetekshi ekonomısi, Rıga tehnıkalyq ýnıversıtetiniń profesory, Rıtýms Rozebergs – «Netkariga Rita avize» gazetiniń saıası sholýshysy, Aleksandr Vıdákın – Baltyq-Qazaqstan ekonomıkalyq yntymaqtastyq qaýymdastyǵynyń tóraǵasy jáne Latvıa Ekonomıka ınstıtýtynyń ózge de sarapshylary.
İs-sharanyń moderatory Latvıa ǵylym akademıasy Ekonomıka ınstıtýtynyń dırektory Nına Lınde boldy. Syndarly pikirtalas barysynda Ý. Aýgýlıs, A. Kraýze, L. Shevsova, B. Rıvja jáne Ia. Vanags sóz sóıledi, olar Prezıdent Q. Toqaevtyń odan ári demokratıalandyrýǵa, azamattyq ınstıtýttardy nyǵaıtýǵa, memlekettik basqarý tetikterin jetildirýge, qazaqstandyqtardyń ómir sapasy men deńgeıin arttyrýǵa baǵyttalǵan aýqymdy jańǵyrtylǵan kún tártibin joǵary baǵalady.
Sonymen qatar, Memleket basshysy alǵa qoıǵan strategıalyq maqsattar men mindetter álemdik saıasat pen ekonomıkanyń KOVID-19 pandemıasynan keıingi damýynyń basymdyqtarymen naqty úılesetini ataldy.
İs-sharaǵa qatysýshylar túrli salalarda ortaq múddelerdiń bar ekenine toqtalyp, Qazaqstan men Latvıa arasyndaǵy yntymaqtastyqtyń qolda bar áleýetin tıimdi paıdalaný qajettigimen kelisti.