Shymkentte qala ákiminiń orynbasary Rýslan Berdenovke qastandyq jasaý isi boıynsha basty sot otyrysy bastaldy. Sottalýshy Ernar Jıenbaıdyń aıtýynsha, áreketine qyzmettegi kıkiljiń emes, jeke qyzǵanysh sebep bolǵan, - dep habarlaıdy aqshamnews.kz tilshisi.
6 tamyzda bastalǵan sot otyrysy sottalýshydan jaýap alýdan bastaldy. Jıenbaı bul istiń qyzmettik máselelerge qatysy joq ekenin, bári qyzǵanyshtan týǵanyn aıtty.
"Muny halyq estýi kerek. Bul jumysqa baılanysty emes. Bári qyzǵanyshtan boldy", – dedi ol.
Sotta Jıenbaı otbasyna qatysty málimetterdi bólisip, áleýmettik jelilerde taraǵan qaýesetterdi joqqa shyǵarýǵa tyrysty.
"6-synyptan beri birge oqyǵan meniń adal jarym, súıikti áıelim. Ol eshqashan bóten adammen aralasqan emes. Jaqsy otbasynan shyqqan, tárbıeli qyz. Áleýmettik jelilerde jazǵandaı jeńiltek emes", – dedi ol.
Onyń aıtýynsha, olardyń tuńǵysh uly – aýtızmge shaldyqqan bala. Jubaıy da osyndaı dıagnozben tárbıelenip jatqan týys otbasyǵa jıi baryp turǵan. Bul otbasy Rýslan Berdenovtiń týystary bolyp shyqqan. Áıeli sol otbasymen birge balany damytý sabaqtaryna aparyp júrgen.
"Jubaıym Berdenovpen bir otyrysta bolǵan, sol jerde "qara kasa" (chernaıa kasa) oınaǵan", – dedi Jıenbaı.
Ýaqyt óte kele Jıenbaıdyń aıtýynsha, áıeli Berdenovten "sulýsyń" degen habarlama alǵan. Ol kezde Jıenbaı kúmándanbaǵanyn aıtty.
"Telefonyna qarasam, Rýslan Berdenov laık qoıyp, "sulýsyń" dep jazypty. Mende artyq oı bolǵan joq. Men de ondaı sózderdi ápkelerime aıtyp júremin", – dedi ol.
Qastandyq jasalardan bir kún buryn Berdenovke qabyldaýǵa barýǵa daıyndalyp jatqanyn, alaıda áıeli kıimin daıyndap úlgermegenin aıtty. Kóılektiń etegi kúıip qalǵan.
"Keshigip bara jattym. Sol kezde áıelim Rýslan Berdenovtiń qandaı kıim kıetinin aıtyp ketti. Onyń aıtýynsha, ol 5 mıllıon turatyn kostúmder kıedi eken. Bul da qastandyq jasaýǵa sebepterdiń biri bolǵan shyǵar", – dedi Jıenbaı.
Sot memlekettik tilde, ashyq formatta ótip jatyr. Rýslan Berdenov sotqa qatyspady. Onyń ókili Jeńis Tynybektiń aıtýynsha, sheneýnik qazir em alyp jatyr. Sot zalynda Jıenbaıdyń áıeli de qatysyp jatyr.
Buǵan deıin, 28 shildede Shymkenttiń mamandandyrylǵan qylmystyq ister jónindegi sotynda aldyn ala tyńdaý ótken bolatyn. Ol kezde de Rýslan Berdenov sotqa qatyspaǵan.
İsti prokýror Baýyrjan Qaramanov júrgizip jatyr. Onyń málimetinshe, 2025 jylǵy 21 sáýirde Ernar Jıenbaı qala qurylys basqarmasyndaǵy nysandardy baqylaý bóliminiń bastyǵynan "Turǵyn úı Shymkent" JSHS basshysy qyzmetinen ketý týraly Berdenovtiń nusqaýy baryn estigen.
Sot Ernar Jıenbaıdy QR QK 24-baby 3-bóligi jáne 99-baby 1-bóligi ("Adam óltirýge oqtalý") boıynsha aıyptap otyr. Keıbir derekterge qaraǵanda, ol buǵan deıin "Turǵyn úı Shymkent" JSHS mekemesin basqarǵan. Sot Jıenbaıdyń bet-júzin túsirýge qarsy ekenin eskerip, túsirilimge shekteý qoıdy.