Óńirlik komýnıkasıalar qyzmetiniń alańynda qalanyń ınjenerlik ınfraqurylymyn jańǵyrtý boıynsha júrgizilip jatqan jumystarǵa arnalǵan baspasóz konferensıasy bolyp ótti. Almatynyń Energetıka jáne sýmen jabdyqtaý basqarmasynyń basshysy Nurbaqyt Serikbaı sýmen jabdyqtaý, jylýmen qamtý, elektrmen jabdyqtaý, gazdandyrý men kóshe jaryǵyna qatysty qolǵa alynǵan negizgi jobalar jaıly aıtyp berdi.
Almaty sýdy alty jer men jerasty sý uńǵysynan alady. Qýattylyǵy 1,3 mln m³ bolǵanymen, qala bir táýlikte 700 myń m³ sý tutynady. 2024 jyly soǵan baılanysty 294,3 shaqyrymdyq jańa sý qubyry tartylyp, 51,5 shaqyrym eski jeli jańǵyrtylǵan. Osylaısha qubyrdyń tozý deńgeıi 53,8%-dan 52,8%-ǵa deıin báseńdep, ortalyqtanǵan sýmen qamtý da 99,6%-ǵa jetti.
2025 jyldyń sońyna deıin taǵy 260 shaqyrym sý jelisin salý josparlanyp otyr, bul qamtýdy 99,9%-ǵa deıin arttyryp, tozýdy 52,2%-ǵa deıin azaıtpaq. Sonymen qatar, táýligine 90 myń m³ qýattylyqqa ıe «Aqsaı», «Ermensaı» sý uńǵymalarynyń qurylysy júrip, «Barlyq» jobalanyp jatyr.
2025 jyldyń sońyna deıin 87 shaqyrym káriz jelisin qaıta jańǵyrtyp, salýdy josparlap otyr. Bul jeliniń tozýyn 51,2%-ǵa deıin tómendetýge múmkindik bermek. Sondaı-aq, Naýryzbaı aýdanyn tolyq qamtýdy kózdeıtin Batys káriz kolektorynyń (34,9 km) qurylysy jalǵasyp jatyr.
1 399,9 shaqyrym jylý jelisiniń 56,1%-y tozǵan. Bıyl 61 nysanda 39 shaqyrym jylý jelisi qaıta jańǵyrtylady, sonyń 24 shaqyrymynda jumys bitti. Sonyń arqasynda jeliniń tozý deńgeıi 54,3%-ǵa deıin tómendemek.
Sonymen qatar, 17 qazandyqty da jańǵyrtý jumystary qolǵa alyndy, bul olardyń tozýyn 65,1%-dan 62,1%-ǵa deıin azaıtady.
- Qalada 8,9 myń shaqyrym elektr jelisi bar, onyń 64,5%-y jańartýdy qajet etip tur. 2025 jyly 123 shaqyrym jeli jańǵyrtylady. Jańa shaǵyn aýdandar (Keńsaı, «Keń jyra», «ITP» AEA jáne t.b.) elektrmen qamtylyp jatyr.
- Qaladaǵy gaz jelisiniń uzyndyǵy – 6,3 myń shaqyrym, onyń da 36% tozǵan. Bıyl 31,7 shaqyrym jeli jańǵyrtylyp, onyń 21,1 shaqyrymy (67%) jasalyp bitipti. Sóıtip, jeke sektordyń 99,4% gazben qamtylǵan.
ÓKQ spıkeri shahardaǵy syrtqy jaryqtandyrý jumysy týraly da aıtyp ótti. Almatyda qazir shamamen 200 myń jaryq núktesi bar eken. 2024 jyly 40 myńnan astam sham aýystyrylyp, 300 shaqyrym jeli qalpyna keltirilgen. Bıyl da ol jumysty jalǵastyryp jatyr:
• 15 myńnan astam sham men 5,6 myń torsher ornatylady,
• jaryqsyz qalǵan 1 189 jerge jeli tartylady,
• 70 nysanǵa arhıtektýralyq jaryq berý júrgiziledi.
Sonymen qatar, 1 100 basqarý shkafy aýystyrylyp, 70 shaqyrym jeli jańǵyrtylyp, sonyń arqasynda 100%-ǵa jaryqpen (qazirgisi – 90%) qamtylady.
«Jumysty júıeli túrde kezeń-kezeńimen, Memleket basshysy nusqaǵan basymdyqty eskere otyryp júrgizip jatyrmyz», – dedi Nurbaqyt Serikbaı.