"Meniń Qapshaǵaı sý qoımasy men İle ózeniniń jaǵalaýynda zańsyz berilgen 82 jer ýchaskesine qatysty aryzyma sáıkes, QR ASHM Jer resýrstaryn basqarý komıteti Almaty oblysynyń Jer resýrstaryn basqarý departamentine jospardan tys tekserý júrgizý týraly tapsyrma joldady!" - delingen jazbada.
Depýtattyń aıtýynsha, Qapshaǵaı sý qoımasy men İle ózeniniń sý qorǵaý beldeýlerinde ornalasqan 82 jer ýchaskesi jeke jáne zańdy tulǵalardyń menshigine rásimdelip ketken. Al mundaı jerlerdi jekeshelendirýge zańmen tyıym salynǵan.
Jer kodeksi men Sý kodeksi boıynsha, sý qorǵaý aımaqtary men erekshe qorǵalatyn tabıǵı aýmaqtar (EQTA) aınalymǵa shyǵarylmaýy tıis. Biraq EGKN bazasynda bul ýchaskeler jeke menshik retinde tirkelgeni anyqtaldy.
"Nátıjesinde qarapaıym halyq Kapshaǵaı sý qoımasy men İle ózeniniń arnasyna erkin óte almaı otyr. Sý jaǵalaýy beton dýaldarmen qorshalǵan. Bul – azamattardyń sý resýrstaryna erkin qol jetkizý quqyǵyn óreskel buzý", - dep jazdy Baqytjan Bazarbek.
Depýtat Bas prokýratýraǵa, Aýyl sharýashylyǵy mınıstrliginiń Jer resýrstaryn basqarý komıtetine jáne Sý resýrstary jáne ırrıgasıa mınıstrligine resmı túrde ótinish joldaǵanyn aıtty.