JRVI men tumaý maýsymy aldynda durys tamaqtaný men uıqy, dene shynyqtyrý ımýnıtetti jaqsartýǵa kómektesedi.
Bul týraly Almaty qalasy N36 qalalyq emhananyń dárigeri Áıgerim Isaǵalıeva aıtty, dep habarlaıdy Almaty-akshamy.kz QazAqparatqa silteme jasap.
«Gormondardyń yrǵaǵyn saqtaý úshin saǵat 23.00-ge deıin jatyp, tańǵy 7 nemese 8-de oıanǵan durys. Kúnine kem degende 7-10 myń qadam júrgen durys jáne shynyǵý prosedýrasyn shekten asyrmaý kerek, mysaly, aıaǵyńyzdy sýyq sýmen jýý kezinde. Talshyq pen dárýmenge baı jemis pen kókónisti kóbirek jeńiz. Kúndelikti tamaqtan kofe men alkogóldi alyp tastaǵan durys. Alkogóldi jáne kofeındi sýsyndar ımýndyq júıeni álsiretip, júrekke qosymsha salmaq túsiredi», - deıdi dáriger.
Ol stresten aýlaq bolýǵa keńes berdi, sebebi, stress ımýndyq júıege keri áser etýi múmkin. Gıgıena erejelerin saqtaý, qoldy jýý, ınfeksıanyń aldyn alý úshin dezınfeksıalyq quraldardy qoldaný qajet. Sonymen qatar, dáriger tumaýǵa qarsy vaksına alýdy eske saldy, sebebi, ol aýrýdyń aldyn alýǵa jáne ımýndyq júıeni nyǵaıtýǵa kómektesedi. Vaksınany turǵylyqty jerińiz boıynsha emhanada tegin alýǵa bolady.
Áıgerim Isaǵalıeva sondaı-aq profılaktıkalyq dári-dármekterdi de qabyldaýǵa bolatynyn aıtty.
«Qoldanar aldynda sýyq mezgilge deıin ımýnıtetti nyǵaıtý úshin qandaı dárýmen men mıneraldy qabyldaý kerek ekenin dárigerden belgenińiz jón. Sondaı-aq árıne maýsymǵa sáıkes kıiný kerek», - dep túıindedi dáriger.