Qala boıynsha 4 beket jumys istep tur
Kúzde Almatyda avtobýstarǵa gaz quıatyn jańa beket ashylmaq. Bul týraly «QAZAQGAZ» Ulttyq kompanıasynyń tóraǵasy Sanjar Jarkeshov aıtty, dep habarlaıdy Almaty-akshamy.kz Almaty.tv-ge silteme jasap.
Bul óz retinde gaz quıý beketiniń tapshylyǵyn azaıtpaq.
Almatydaǵy gaz quıatyn 3 bekettiń isten shyǵýy qoǵamdyq kólik qozǵalysyn shektep, kepteliste turýǵa májbúr etken edi. Kesirinen ınterval uzaryp, jolaýshylardan túsetin shaǵym jıiledi.
«1-2 aıdaı qınaldyq. 5-6 saǵat kezekte turǵan kúnderimiz boldy. Halyq meni jep qoıa jazdaıtyn "Qaıda júrsiń?" dep. Olarǵa túsindirip aıta almaısyń. Qazir endi durystaldy. Basshylarǵa rahmet», – dedi avtobýs júrgizýshisi Baqyt Qońyrbaev.
Al qazir avtobýsqa gaz quıý shamamen 10 mınýt ýaqyt alady. Qyzmetkerlerdiń aıtýynsha, dál osy beketke kúnine 200-deı avtobýs keledi. Aıta ketsek, qala boıynsha 4 beket jumys istep tur.
«Qazir «Almatyelektrotrans» boıynsha 700-den astam avtobýs bar. Kelesi jyly taǵy qoǵamdyq kólik alamyz. Onyń bári gazben júredi. Avtobýs kóbeıgen saıyn beket sanyn artyrsa jaqsy bolar edi», – dedi №1 komýnaldyq avtobýs parkiniń dırektory Erlan Sembaev.
Al «QAZAQGAZ» Ulttyq kompanıasy tóraǵasy jyl sońyna qaraı 5-beket iske qosylatynyn aıtty.
«Almaty qalasynyń ákimdigimen birlesip 2 AGNKS kompresorlyq stansa qurylady. Qyrkúıektiń sońynda 5-stansa beriledi. Keıin taǵy da 2 stansa salynady», – dedi «QAZAQGAZ» Ulttyq kompanıasy» AQ basqarma tóraǵasy Sanjar Jarkeshov.
Ulttyq kompanıa ókilderi jańa 2 bekettiń qurylysyn aldaǵy 2 jylda aıaqtap, qoldanysqa berýdi josparlap otyr. İske assa Almatyda gaz quıatyn 7 beket jumys isteıtin bolady.