Biraq bul ýaqytsha ǵana.
Qys – qyr astynda. Aýyldaǵy aǵaıyn qystan qysylmaı shyǵýy úshin aldymen mal azyǵynyń qamyn jasasa, keıin erte kóktemge deıin úıdi jylytýdyń jaıyn oılaıdy. Qalalarda pesh arqyly jylytylatyn jer úıler ıeleriniń basty máselesi de – osy. Biraq jyldaǵy dástúr boıynsha bıyl kómirdiń baǵasy óskeni baıqalady, dep habarlaıdy Almaty-akshamy.kz inbusiness.kz-ke silteme jasap.
Tamyz, qyrkúıek pen qazan aılary – qatty otynǵa degen suranys kúrt ósetin ýaqyt. Suranys bar jerde baǵanyń ósýi de bolary sózsiz. Aıtalyq, jergilikti "Maıkóben-Vest" kompanıasy kenishten bosatylatyn bir tonna kómirdiń baǵasyn 500 teńgege ósirdi. Byltyr bir tonnasy 7500 teńgeden jóneltilse, bıylǵy baǵa – 8000 teńge. Al "Bogatyr-Kómir" men "Gamma Sarykól" kásiporyndary ázirshe baǵaǵa ózgerister engizgen joq. Alǵashqysy kenishten qatty otynnyń tonnasyn 3413 teńgeden, sońǵysy 7000 teńgeden satýda.
Bul baǵa qarapaıym tutynýshylarǵa jetkenge deıin eki, tipti úsh esege deıin qymbattaıdy. Eldi meken kenishten neǵurlym alshaq bolsa, baǵa da soǵurlym qymbattaı túspek.
"Tas kómirdiń bir tonnasynyń baǵasy 9500 teńgeden bastalyp, 25 myń teńgege deıin jetedi. Qońyr otynnyń tonnasy 11 500 teńgeden bastalyp, 20 myń teńgege deıin bolady. Iaǵnı, baǵa eldi mekenniń qashyqtyǵyna baılanysty ózgeredi. Sebebi jetkizý qyzmetiniń aqysy esepke alynady", - deıdi Pavlodar oblystyq energetıka jáne turǵyn úı – komýnaldyq sharýashylyq basqarmasynyń basshysy Erjan Salhanov.
Osydan-aq baǵanyń óskenin baıqaý qıyn emes. Salystyrmaly túrde qarasaq, byltyr eldi mekenderdiń kenishterden araqashyqtyǵy men kómirdiń surpyna qaraı turǵyndarǵa bir tonnasy 8-20 myń teńge aralyǵynda satylǵan-dy. Bıylǵy baǵa 1500-5000 teńge aralyǵynda ósip otyr. Buǵan deıingi tájirıbe kórsetkendeı, qara sýyq túskende baǵa taǵy qubylýy ábden múmkin.
Jalpy, Pavlodar oblysynyń turǵyndary úshin qys boıy 399 myń tonna kómir kerek bolady. Qazir óńirdegi satý núktelerinde ázirshe 15 myń tonnasy bar. Aımaqta aýyldarǵa kómir tasymaldaýmen 300-den astam jeke kásipker aınalysady.
Al óńirdegi áleýmettik nysandardy jylytýǵa 130,3 myń tonna kerek. Búginde onyń 17,5 myń tonnasy jetkizildi.
Aıta keteıik, elimizde óndiriletin 63 mln tonnaǵa jýyq kómirdiń 37 mln tonnasy Pavlodar oblysy aýmaǵyndaǵy kenishterden shyǵarylady.