Qytaı kompanıasy Barselona qalasynda ótken búkil álemdik MWC 2025 mobıldi kongreste jurtshylyq nazaryna ázirge konsepti (konsepsıa) túrindegi Yoga Solar PC noýtbýkty usyndy.
Energıany tıimdi paıdalanýǵa múmkindik beretin, sonysymen qorshaǵan ortaǵa zıany az erekshe noýtbýk kún kózinde 20 mınýt tursa, osy az ýaqyt ishinde alǵan qýaty bir saǵat derbes jumys isteýine jetedi, dep habarlaıdy aqshamnews.kz.
Kúnnen qýat alatyn óte juqa noýtbýktyń joǵarǵy qaqpaǵyna kún paneli tikeleı kiriktirilgen. Bul noýtbýkty elektr jelisine qospaı qýattaýǵa múmkindik beredi. Yoga Solar PC-degi kún paneli «Back Contact Cell» tehnologıasy boıynsha qosylǵan kontaktileri bar 84 elementten turady: barlyq elektr qosylystary jaryqty barynsha ustaý úshin elementterdiń artynda ornalasqan. Ázirleýshilerdiń aıtýynsha, mundaı qurylym 24% -dan astam kún sáýlesiniń elektrge aınalý koefısıentin qamtamasyz etedi - tutyný elektronıkasyndaǵy eń joǵary kórsetkishterdiń biri.
Noýtbýk kún paneliniń parametrlerin únemi qadaǵalap otyratyn jáne energıa jınaýdy ońtaılandyratyn Dynamic Solar Tracking júıesimen jabdyqtalǵan. Al Solar-First Energy tehnologıasy kún energıasyn paıdalanýǵa basymdyq berý úshin zarádtaý qurylǵysyn retteıdi. Noýtbýk, tipti, bólme jaryǵynda da qýattalady, degenmen, kúnniń jaryǵyna jetpeıdi. Qyzyǵy, jaryq álsiz bolsa da panel batareıanyń zarádyn kútý rejıminde ustap turýǵa jetetindeı elektr energıasyn shyǵarady. Yoga Solar PC noýtbýgynyń qalyńdyǵy - 15 mm, al salmaǵy - 1,22 keli. Modelde Intel Lunar Lake prosesory, 32 GB operatıvti jady, 1 TB kiriktirilgen jady jáne 14 dúımdik OLED-ekran ornatylǵan.
Samsung kompanıasy 2011 jyly kún energıasymen jumys isteıtin alǵashqy noýtbýkty - NC215S modelin shyǵardy, degenmen, Lenovo konsepsıasy áldeqaıda juqa jáne tez zarádtalady. Atalmysh kompanıa, sondaı-aq, MWC 2025 kórmesinde qoldanystaǵy Yoga noýtbýkteri úshin kún energıasymen qýattaýǵa arnalǵan syrtqy jıyntyq konsepsıasyn usyndy. Qurylǵy eki jınalmaly kún paneli bar tuǵyrdaǵy ashylǵan kitapqa uqsaıdy jáne qurylǵyny USB-C porty arqyly zarádtaı alady.