Internette eń kóp qaralatyn saıttardyń qataryn Kundelik.kz bastap turǵany jaıly buǵan deıin birneshe ret aıtyldy. Kún saıyn ata-ana, oqýshy men muǵalimniń saǵattap otyratyn platformasy jarnama berýshilerdiń de nazaryna ilinse kerek. Qazir taýaryn ótkizýge asyqqan kásipkerlerdiń barlyǵy reıtıńte kósh bastap turǵan saıtqa jarnama beredi. Osylaısha, 6500-den astam mektepke arnalǵan bilim alý júıesi habarlandyrý taqtasyna aınalǵan, dep jazady Aikyn.kz.
Toqsan sońynda saıt istemeı qalady
Álem elektrondy kúndelikti 1975 jyldan bastap qoldansa da, bizdiń elge bul júıeniń kelgenine 7 jyl boldy. Kem-ketigi de barshylyq. Ásirese, ustazdar qaýymy elektrondy kúndeliktiń tıimsiz ekenin aıtyp, shaǵymdanýdan sharshaǵan emes. Aıtalyq, biraz mektepte synyp jetekshileri ata-analarǵa Kundelik.kz-ke turaqty túrde kirip otyrýdy tapsyrady eken. Sebebi árbir oqýshynyń ata-anasynyń kirgeni elektrondy kúndelikte kórsetilip turady. Al pedagogterdiń aıtýynsha, olar óz synybynan qansha adamnyń qansha ret saıtqa kirgeni jóninen esep tapsyrýǵa májbúrlengen. Kompanıanyń talaby sondaı bolsa kerek. Birneshe jyl buryn zero.kz ınternet-statıstıka servısindegi reıtıńte Kundelik.kz únemi birinshi orynda turatyn. Osynyń arqasynda reıtıng basyndaǵylardyń jarnamalyq tabysy da jaqsy júredi.
– Kundelik.kz-tiń muǵalimderge artatyn jumysy kóp. Kún saıyn onlaında úı tapsyrmasyn berip, ýaqytyn belgilep, baǵa qoıamyz. Kúnde 100 paıyz toltyrmasaq, reıtıńimiz túsip qalady. Aýyldy jerdiń barlyǵynda ınternet jyldam jumys istemeıdi. Sondyqtan keıde mektepte otyryp elektrondy kúndelik toltyramyz. Toqsannyń aıaǵynda búkil muǵalim kirgendikten, saıt istemeı qalady. Iaǵnı, bir adamnyń birneshe ret saıtqa kirýi. Bir muǵalim saıtty 15 paraqshadan ashyp qoıady. Nátıjesinde, Google sizdi haker dep oılap, avtomatty túrde saıttan shyǵaryp tastaıdy, – deıdi ınformatıka pániniń muǵalimi Almagúl Isabekova.
Avtomattandyrý jaǵyn retteý kerek
Jalpy, elektrondy kúndeliktiń maýsymdyq ónim ekeni jasyryn emes, sebebi oqýshylarmen tikeleı baılanysty bolǵandyqtan, shákirtter de, ata-analar da kanıkýl kezinde onlaın kúndeliktiń betin ashpaıtyny málim. Alaıda elimizdegi júzdegen myń pedagog kún saıyn kirgen soń, Kundelik.kz jaz kezinde de reıtıńte alǵashqy ondyqqa kiredi. Elektrondy kúndelikti paıdalanatyndardyń 51 paıyzy - mektep oqýshylary, 13 paıyzy - muǵalimder bolsa, 36 paıyzy - ata-analar. Jaqynda ata-analar men muǵalimder úı tapsyrmasy jáne baǵalardan bólek, platformada basqa da kóptegen jarnamalardyń jıi kezdesetinin aıtyp dabyl qaqty. Oqý prosesine qatysýshylarǵa tamaq pen áshekeı, kıno men kıimderdiń jarnamasy qajet pe degen suraq týyndaıdy. Tipti elektrondy kúndelikte «túngi shaıqasqa» arnalǵan jumsaq matrasty jarnamalaıtyndardy keziktire alasyz. Bilim sarapshysy Meıirjan Temirbektiń aıtýynsha, Kundelik – jekemenshik kompanıa. Memleket tarapynan aqsha tólenbeıdi. Jarnama arqyly kúnin kórip otyr. Kaznette reıtıń jaǵynan aldyńǵy orynda. Qoldanýshylary óte kóp. Bul platforma Reseıdegi «Dnevnıktiń» balamasy, biraq ishki fýnksıalary bizdiń Oqý aǵartý mınıstrliginiń buıryqtaryna qaraı kóp ózgergen.
– Elektrondy kúndeliktiń betindegi jarnamadan kóz súrinedi. «Jarnama salmańdar» dep platformaǵa taǵy aıta almaısyń. Óıtkeni, olar Úkimetten aqsha alyp otyrǵan joq. Jarnamadan túsken qarjymen kún kórip otyr. Qyzmetkerleriniń aılyqtaryn da sol tabyspen tólep otyr. Biz «Nege jarnama kóp?» dep shaǵymdanǵanda osyndaı dálelder aıtqan. Kúndeliktiń jumysy áli bir júıege keltirilmegen. Avtomattandyrý jaǵyn retteý kerek, – deıdi Meıirjan Temirbek.
Onyń pikirinshe, elektrondy jýrnal, kúndelik, sıfrlandyrýdy júzege asyryp jatyr demeseń, bul júıeniń ózgertetin tustary kóp. Ustazdar bir sabaqty toltyrý úshin úsh-tórt bet ashyp, álekke túsedi. Odan keıin saıt myńdaǵan muǵalimniń kirgenin kótermeı, istemeı qalady. Sońynda reıtıń durys bolmaǵany úshin taǵy da muǵalim sóz estıdi. Iá, byltyr jazda Kundelik.kz elektrondyq jýrnalyn 1 kún toltyrmaǵany úshin mektep dırektory Almaty oblysynyń Talǵar aýdanyndaǵy matematıka pániniń muǵalimin jumystan shyǵaryp jibergen.
– Aýyldyq eldi mekende turatyndyqtan, bizde ınternettiń jyldamdyǵy tómen. Ózim de ata-ana retinde bilemin. Internet durys istemegendikten, keıde túngi saǵat 2-3-terde toltyramyz. Onyń ústine, ol kezde elde qańtar oqıǵalary bolyp jatqandyqtan, ınternet buǵattaldy. Sondyqtan Kundelik.kz elektrondyq jýrnalyn toltyra almaǵanym ras. Alaıda mektep dırektory ózi de 8 saǵat sabaq beredi. Ózi sol aralyqta 50% kórsetkish qana kórsete alǵan. Onda nege ózine-ózi shara qoldanbaıdy? Zań barlyǵymyzǵa ortaq, – dep qapalanady Janat Ermekbaıqyzy.
Osylaısha, elektrondy kúndelik jarnama jarıalaýdan aldyna jan salmasa da, júıeniń qateliginen qanshama muǵalimniń obalyna qalyp otyr. Al kompanıanyń jarnamadan qansha tabys tabatyny belgisiz. Biz kundelik.kz-ke jarnama berýshi retinde habarlasyp kórdik.
– Jarnama berý úshin bizge ýaqyttyń aralyǵy men qaı qalalarǵa jarnama jasaıtynyńyzdy aıtsańyz jetkilikti. Bizde banerlik, maqala jáne muǵalimderge arnalǵan arnaıy bólim sıaqty jarnama túrleri bar. Jarnamanyń baǵasy belgilengen ýaqytqa jáne aımaqqa tikeleı baılanysty. Mysaly, Almatyda 700, al respýblıkada 700 myń muǵalim bar. Sondaı-aq, bilimge qatysty jarnamalarǵa jeńildik qarastyrylǵan. Eger siz Astana qalasy boıynsha eki aıǵa saıtqa jarnama ornalastyrsańyz baǵasy 650 myń teńge turady. Maqsatty aýdıtorıada balalar joq bolsa, ata-analar men muǵalimderge arnalǵan jarnamalardy da bere alasyz. Jarnama belgili bir talaptarǵa saı kelýi kerek. Kóbinese durys tamaqtaný, oqý aǵartýǵa, turmystyq qoldanysqa arnalǵan jarnamalar shyǵady. Osynsha jarnama alamyz degen shekteý joq. Trafık kóp bolǵandyqtan ala beremiz. Jarnamalar asyp qalatyn bolsa biz ony Iandekske satyp jiberemiz. Oqý aǵartý mınıstrligi saıtty qadaǵalap, baqylaýdan ótkizip otyrady, – deıdi kundelik.kz saıtynyń menedjeri Ardaq.
Kompanıa eshqashan memlekettik sýbsıdıa almaǵan. Oqý-aǵartý mınıstrligi de bul jobany qarjylandyrmaǵan eken. Sondyqtan paıdalanýshylar kóretin jarnama – bul jumysshylardyń eńbegin, jaldaý aqysyn jáne salyqtardy tóleýdiń jalǵyz tásili. Sondaı-aq, osy tabystan elektrondy portaldy damytýǵa ınvestısıa da salynady eken.
P.S: 6500 mektep pen 7 mıllıonǵa jýyq qoldanýshysy bar platforma jumysyna aıtylar syn kóp. Biraq kompanıa «jarnamamen kún kórip otyrmyz» dep ózin-ózi aqtap alyp otyr. Endeshe, jarnamamen jan baǵatyn Kundelik.kz-ke Oqý aǵartý mınıstrligi qaraılasatyn ýaqyt keldi.
Aqparat Aikyn.kz alyndy.