Qazaqstannyń úsh óńirindegi qymbatshylyq 30%-dan asqan.
Bul salada baǵanyń aıryqsha qymbattaýy ekinshi jyl qatarynan baıqalyp otyr, dep habarlaıdy Almaty-akshamy.kz Energyprom.kz saıtyna silteme jasap.
Bir lıtr kúnbaǵys maıyn qazaqstandyqtar ortasha eseppen 769 teńgege satyp alýǵa májbúr. Bıylǵy jyldyń qańtar aıynda baǵanyń jyldyq ósimi 25,7%-dy qurady.
Salystyrý úshin: osy kezeńde Qazaqstanda azyq-túlik baǵasy 9,9%-ǵa qymbattap, jalpy alǵanda jyldyq ınflásıa 8,5%-dy qurady. 2021 jyldyń qańtarynda bul saladaǵy baǵanyń jyldyq ósimi budan da joǵary — 38,6% bolǵan.
Elimizdiń iri qalalary men megapolısteriniń arasynda eń qymbat kúnbaǵys maıy Atyraýda (bıylǵy jyldyń qańtarynda lıtri 836 teńge bolǵan), Nur-Sultanda (lıtrine 817 teńge) jáne Aqtaýda (lıtrine 814 teńge), eń arzan baǵa – Semeıde (lıtrine 696 teńge) bolǵan.
Atalmysh saladaǵy baǵanyń eń qatty joǵarylaýy Batys Qazaqstan (jylyna +35,6%), Jambyl (+34,9%) jáne Aqmola (+31,4%) oblystarynda baıqalǵan. Kúnbaǵys maıy baǵasynyń eń az ósimi Shyǵys Qazaqstan oblysynda baıqaldy – jylyna «bar bolǵany» 18%-ǵa qymbattaǵan.
2021 jyldyń 12 aıynda tazartylǵan kúnbaǵys maıynyń óndirisi 147,6 myń tonnany qurady, bul bir jyl burynǵydan 9,2%-ǵa artyq. Óndirilgen ónimniń 95,2%-y úsh negizgi óńirdiń úlesine tıdi: Shymkent (61,5 myń tonna), Shyǵys Qazaqstan oblysy (57,2 myń tonna) jáne Almaty (21,8 myń tonna).
Tazartylmaǵan maı óndirý, kerisinshe, ótken jyldyń qańtar-jeltoqsan aılarynda 183,6 myń tonnaǵa deıin (jylyna 2,4%-ǵa) azaıdy. Mundaǵy ónimniń 77 paıyzdan astamyn bir ǵana Shyǵys Qazaqstan oblysynyń maı óndirýshileri (142 myń tonna) qamtamasyz etti.
2021 jyldyń 11 aıynyń qorytyndysy boıynsha, otandyq óndirýshiler kúnbaǵys maıy naryǵyn 78,8%-ǵa qamtamasyz etti.
Óndiristiń ósýi aıasynda ımport ótken jyldyń osy kezeńimen salystyrǵanda 13,2%-ǵa azaıdy. Qazaqstannan syrtqa shyǵarylatyn maı kólemi bir jylda 19 paıyzǵa derlik qysqardy.
İshki naryqtaǵy satý kólemi 8,3%-ǵa ósti.
QR Aýyl sharýashylyǵy mınıstrligi qańtarda respýblıkadan 16 myń tonna kúnbaǵys maıyn eksporttaýǵa kvota bóldi. Kvotalardy 47 kásiporyn aldy.
Eksporttyń eń úlken mólsheri – 920 tonna «Shymkent Optima Logistic» JSHS jáne «Uly dala export» JSHS-ne, sondaı-aq Shyǵys Qazaqstan oblysy («Qazaq Astyq Group» JSHS jáne «Sei-Nar Production Complex» JSHS) jáne Qostanaı oblysyndaǵy («Ortamaks» JK) kompanıalaryna tıesili boldy.
Sondaı-aq mınıstrlik aqpan aıynda kúnbaǵys maıynyń eksporttyq kvotasyna ótinim qabyldaý bastalǵanyn habarlady. Kvota kólemi 16 myń tonnany quraıdy.