Almaty oblysy Polısıa departamentiniń burynǵy basshysy Serik Kúdebaev 10 jylǵa sottaldy.
Ol jazasyn qylmystyq atqarý júıesiniń ortasha qaýipsiz mekemesinde óteıtin bolady, dep habarlaıdy Almaty-akshamy.kz. QazAqparat-qa silteme jasap.
Úkimdi Taldyqorǵan qalalyq sotynyń tóraǵasy Abdılla Ýmbetaı shyǵardy.
Aıta keteıik, Serik Kúdebaevqa bılik pen laýazymdyq ókilettigin asyra paıdalaný jáne azaptaý baptary boıynsha aıyp taǵyldy.
Biraq sottalýshy taǵylǵan aıyppen kelispeı, kinásiz ekenin jetkizdi.
«Men kináli emespin. Taǵylǵan aıyppen kelispeımin. Halqyma oq atpadym. Sot aldyndaǵy prosesterde jasaǵan áreketterimniń barlyǵy zańdy ekenin aıtqanmyn. Eshqandaı azaptaý bolǵan joq. Jábirlenýshilerdiń ózderi ony joqqa shyǵardy»,- dedi Serik Kúdebaev sottaǵy sońǵy sózinde.
Búgin saǵat 11:00 de ótýi tıis sot otyrysy birneshe saǵatqa keshigip bastaldy. Serik Kúdebaevti sot zalyna arnaıy kúzetpen jetkizdi. Sot otyrysy 13:25-te bastaldy. Proses bastalmas buryn Serik Kúdebaevtiń uly Arman Myrzaqulov ákesiniń elge óz erkimen kelgenin málimdedi.
Prokýror sýdıadan S.Kúdebaevqa 9 jyl bas bostandyǵynan aıyrý jazasyn taǵaıyndaýdy surady.
Almaty oblystyq Polısıa departamentiniń burynǵy basshysy Kúdebaev qańtar oqıǵasyna qatysty kúdikti dep tanylǵan edi.
Ol 2020 jyldan bastap 2022 jyldyń qańtaryna deıin Almaty oblysy Polısıa departamentiniń bastyǵy qyzmetin atqardy.
2022 jyldyń 18 aqpanynda ol ishki ister organdarynan óz erkimen bosatyldy.
30 naýryz, saǵat 11:00-de Serik Kúdebaevqa qatysty sot prosesi ótýi tıis bolǵan. Biraq aıyptalýshy sotqa kelmedi. Soǵan ony sotqa májbúrli túrde jetkizý jóninde qaýly shyqty. Artynsha generaldyń elden qashyp ketkeni belgili bolyp, oǵan halyqaralyq izdeý jarıalandy.
Al 27 sáýir kúni Kúdebaev Túrkıada ustalyp, elge jetkizildi.