Gazetimizdiń aldyńǵy nómirlerinde bılárdtan eki dúrkin álem chempıony Ernar Chımbaevtyń halyqaralyq dárejede óte bedeldi «Kreml Kýbogynda» jeńiske jetkenin habarlaǵanbyz. Qazaqstandyq sportshy elge oralǵan soń, onyń jeńisti jolyn, bılárdtyń qyr-syryn surap, Ernardan qysqasha suhbat aldyq.
– Ernar, sizdi «Kreml Kýbogy» jarysynda jeńiske jetýińizben quttyqtaımyz! Máskeýdegi bul jarys qalaı ótti?
– «Kreml Kýbogy» – bılárdtan álem chempıonatynan keıingi ekinshi júretin jarys bolyp esepteledi. Bıyl bul jarysqa dúnıe júziniń 8 elinen 392 sportshy qatysty. Men úshin jarystyń basy qıyndaý ótti. Sebebi, oıyn babyna kirip, qarsylastaryma úırenisý úshin maǵan biraz ýaqyt qajet. Degenmen, bir-eki kezdesýden keıin ózime degen senim artyp, sheberligimdi búkil jarys boıy kórsete aldym. Al jeke qarsylastarǵa kelsek, Qyrǵyzstan men Ózbekstannyń sportshylary óte myqty boldy. Bul elderdiń ókilderimen jarystyń sheshýshi kezeńderinde saıysqa túsip, tartysty oıyn kórsettik. Kóptegen oıyndarym 5:4 esebimen sońǵy partıany jeńý arqyly meniń paıdama aıaqtaldy. Bastysy, týrnırde jeńiske jetkenime qýanyshtymyn.
– Siz bılárdtyń «qurama pıramıda» atty saıysynan jeńiske jettińiz. Bılárdtyń bul túriniń ereksheligi qandaı?
– «Qurama pıramıdanyń» bılárdtyń ózge saıystarynan basty ereksheligi – ol tek qyzyl sharmen oınalady. Óz kezeginde upaı jınaǵan adam ózine kedergi jasaǵan shardy tóreshige aıtyp alyp tastaı alady. Bul da aıtylǵan saıys ózgeshelikteriniń biri.
– Bılárdqa degen qyzyǵýshylyq qashan paıda boldy? Osy sport túrinen kásibı sportshy bolamyn dep oıladyńyz ba?
– Alǵash ret bılárd taıaqshasyn 2003 jyly 15 jasymda qolǵa aldym. Ol kezde tek oıyn retinde ýaqyt ótkizý úshin baratynmyn. Alaıda, ýaqyt óte kele, sporttyń bul túri maǵan jaqyn ekenin túsindim. Kásibı sportshy bolǵym keldi, sondyqtan eseıgen saıyn kúndelikti jattyǵý jasaýǵa kiristim. Bılárdqa kóńil qoıyp, nátıjesinde birneshe ret Qazaqstan chempıony, 2010 jáne 2021 jyldary álem chempıony atandym. Qazir ózim jarysqa qatysatyn oıynshy ǵana emes, jattyqtyrýshy qyzmetin atqaramyn. Shákirtimniń aldy elimizdiń chempıony atanyp ta úlgerdi.
– Talaı halyqaralyq jarystarǵa qatysyp júrsiz, Qazaqstan bılárdynyń deńgeıin qalaı baǵalar edińiz?
– Qazaqstan quramasynyń deńgeıi óte joǵary. Elimizde 5 álem chempıony bar. Onyń biri ózim, sondaı-aq Álıhan Karaneevti aıta alamyn. Ol – álemniń 3 dúrkin chempıony. Qanybek Saǵyndyqov, Áýez Elýbaev jáne Álimbek Omarov ta bılárd áleminiń shyńyna shyqqan jigitter. Olardy dúnıe júzi boıynsha bılárd súıer qaýym tanıdy. Jas sportshylarymyzdyń da qarqyny jaman emes. Árqashan birinshi oryn ala bermese de, halyqaralyq jarystarda kemi júldeger bolyp keledi.
– Alda bılárd federasıasynyń jáne ózińizdiń qandaı josparlaryńyz bar?
– Bıyl qarasha aıynda kezekti álem chempıonaty ótýi kerek. Qazirgi basty nazar osy jarysta. Degenmen, odan buryn 20 qyrkúıekte ishki birinshilik ótedi. Osy týrnırde úzdik kóringen sportshylar keıin álem chempıonatyna el namysyn qorǵaýǵa attanady. Aıta ketken jón, Qazaqstan chempıonatyna federasıaǵa tirkelip, irikteýden ótken barlyq adamdar qatysa alady.
– Elimizde bılárd odan ári damýy úshin ne isteý kerek?
– Eń birinshi jeke bılárdshylardy qarjylandyratyn demeýshiler kóbeıýi kerek. Keıde óte sheber sportshylarymyz qarjylaı kómek bolmaýynan iri dúnıejúzilik jarystarǵa qatysa almaı jatady. Ekinshiden, el ishinde bılárdtan ótkiziletin jarystar kóbeıýi qajet. Reseımen salystyratyn bolsaq, Qazaqstanda týrnırler 2-3 ese az ótedi. Iaǵnı sportshylarymyz úshin tájirıbe almasyp, sheberligin shyńdaıtyn múmkindik te az. Sondyqtan «Almaty Kýbogy» ne «Nur-Sultan Kýbogy» syndy týrnırler ótkizgenimiz jón. Sonda jastardyń bılárdqa degen qyzyǵýshylyǵy artady jáne týymyzdy kókte jelbiretetin jańa chempıondar paıda bolady.
– Suhbat bergenińiz úshin alǵys bildire otyryp, aldaǵy jarystarda sáttilik tileımiz!