Almaty-akshamy.kz saıtynyń búgingi jańalyqtaryna sholý – kún kerýeni
Taılandqa barma!
Sibir jarasyn juqtyrý qaýpi bar. Týrızm jáne sport mınıstrligi Taılandqa baratyn qazaqstandyqtarǵa eskertý jasady.
«Ashyq derekkózderge sáıkes, Taılandtyń Býrıram provınsıasy jaqyn mańdaǵy Laosta úsh jaǵdaı anyqtalǵannan keıin, aýyr bakterıalyq aýrý bolyp tabylatyn sibir jarasynyń qaýpi bary týraly eskertý jasady. Sibir jarasy janýarlardan adamǵa, mysaly, iri qara men býıvoldyń shıki etin jeý arqyly juǵýy múmkin», delingen Týrızm jáne sport mınıstrliginiń habarlamasynda.
Gúldense aýyl...
Bıyl aýyldardyń ınfraqurylymyn damytýǵa 900 mlrd teńge bólindi.
«Aýyl – el besigi» baǵdarlamasyn iske asyrý aýyldyq jerlerge jeke ınvestısıalar tartýǵa oń áserin tıgizýde. Mınıstrlik tarapynan 2023 jyly búdjet qarajaty shyǵystarynyń tıimdiligine taldaý júrgizildi. Mysal retinde, Túrkistan oblysynyń Tóle bı aýdanynyń 16 aýyly 3,5 mlrd teńgege búdjetten qarjylandyryldy. Osy aýyldarda 21,2 mlrd teńgege 40 jobany iske asyrýǵa jeke ınvestısıa tartyldy. Osylaısha, 1 búdjettik teńgege 6 jeke ınvestısıa teńgesi tıesili ekenin kórip otyrmyz. Al Aqmola oblysynyń Jaqsy aýdanynyń 6 aýylyna 1 búdjettik teńgege 3 jeke ınvestısıa teńgesi tartyldy», dedi Premer-Mınıstrdiń orynbasary – Ulttyq ekonomıka mınıstri Nurlan Baıbazarov.
Qar jaýmaı qalsa, qaıtemiz?
Parlamentte jańa sý kodeksin tanystyrǵan Sý resýrstary jáne ırrıgasıa birinshi vıse-mınıstri Bolat Beknıazdyń aıtýynsha, aldaǵy birneshe jyl elimiz qar men jańbyr sýyn paıdaǵa asyrmaq. 2030 jylǵa qaraı óndiristik kásiporyndar paıdalanatyn sýlarynyń teń jartysyn aǵyn sýlardan alýy tıis.
Qaıtqan jerdiń qaıyry bar ma?
Almaty prokýrorlary 960 gektar jerdi Ulttyq bankke qaıtaryp berdi. Qala prokýratýrasy sot aktileri men sot úkimderin taldaýdyń negizinde «Capital Bank Kazakhstan» AQ men «AsiaCreditBank» AQ taratylǵan bankterdiń jalǵyz aksıoneri bolyp tabylatyn boryshkerdiń (Sh. jaýap berýshiniń) aktıvteri shyǵarylǵanyn anyqtady. Almaty qalasy prokýratýrasynyń málimetinshe, jaýap berýshiniń qaryzy 15 mlrd-tan astam teńgeni qurady.
Kózden ketse de, kóńilden ketpegen...
Eldi 30 jyldaı basqarǵan tuńǵysh prezıdent Nursultan Nazarbaev 2019 jyly 19 naýryz kúni Prezıdenti retindegi ókilettigin toqtatqan edi. Osydan bes jyl buryn dál osy kúni sol kezdegi Memleket basshysy Nursultan Nazarbaevtyń Qazaqstan halqyna úndeý joldap, prezıdenttikten ketetinin málimdegen bolatyn.
Naýryz-kerýen
Almaty kóshelerimen «Kósh. Naýryz –dýman» merekelik kerýeni júrip ótedi. 21 naýryzdaǵy teatrlandyrylǵan kerýenge batyr, búrkitshi, aqyn jáne basqa da obrazdaǵy 1000-nan astam adam qatysady. Sonymen qatar, qala turǵyndary men qonaqtary arbadaǵy kıiz úıdi, qyz kúımesin, qorjynǵa jibek matalar men kilemder artqan túıelerdi, at ústindegi batyrlardy, qumaı tazylar men mergenshilerdi, jalpy jeti qazyna nyshandaryn kóre alady.
«Atadan mal qalǵansha, tal qalsyn!»
Osy támsildi ustanǵan Almaly aýdanynyń Ardagerler Odaǵy men Almaly aýdanynyń Belsendi uzaq ómir ortalyǵynyń aqsaqaldary Qazaqstan-Brıtan tehnıkalyq ýnıversıtetiniń janyna aǵash ekti.
7% kimdi jarylqaıdy?
Elimizde jańa ıpoteka iske qosylmaq. Úkimet jańa ıpotekany sáýirdiń sońynda, mamyrdyń basynda iske qospaqshy. Ázirshe baǵdarlamanyń búge-shigesi aıqyndalǵan joq. Bir anyǵy: 7%-dyq mólsherleme turmysy tómen otbasylarǵa arnalǵan: mundaı sanatqa kópbalaly otbasylar, jetim balalar, múmkindigi shekteýli tulǵalar jáne t.b. Qalǵan jurtqa – 9%-dyq mólsherleme belgilenedi.