Úkimettiń baspasóz qyzmeti Abaı oblysynda qaza bolǵan 14 ormanshynyń otbasylaryna qandaı qoldaý sharalary kórsetiletinin málim etti, dep habarlaıdy QazAqparat.
Memleket basshysynyń tapsyrmasyn oryndaý maqsatynda qaza bolǵandardyń otbasylaryna kelesi qoldaý sharalary kórsetiledi:
1) otbasynyń eńbekke jaramsyz barlyq múshesine (kámeletke tolmaǵan balalarǵa) respýblıkalyq búdjetten asyraýshysynan aıyrylý boıynsha járdemaqy;
2) otbasynyń eńbekke jaramsyz barlyq múshesine Memlekettik áleýmettik saqtandyrý qorynan asyraýshysynan aıyrylý boıynsha birjolǵy áleýmettik tólemaqy;
3) qajetti jıhazben jabdyqtalǵan turǵyn úımen qamtamasyz etý;
4) BJZQ-dan jerleýge arnalǵan birjolǵy tólem.
Sondaı-aq nesıelerdi esepten shyǵarý úshin qaıtys bolǵan adamdar men olardyń otbasylarynyń nesıelik júktemesi anyqtalady.
Buǵan deıin habarlaǵanymyzdaı, keshe Úkimet basshysy Álıhan Smaıylovtyń tóraǵalyǵymen Abaı oblysyndaǵy iri tabıǵı órtti joıý jáne odan zardap shekken otbasylarǵa qajetti qoldaý sharalaryn kórsetý máseleleri jóninde jedel keńes ótti. Málim bolǵandaı, qaza tapqandardyń otbasylaryna «Qazaqstan halqyna» qorynan 7 mln teńgeden, sondaı-aq kámeletke tolmaǵan ár balaǵa 2 mln teńgeden tólenetin bolady.
Budan bólek, qaza tapqandardyń otbasylaryna jáne zardap shekkenderge qajetti qoldaý sharalaryn kórsetý maqsatynda arnaıy qor quryldy.
Sonymen qatar 40-tan astam qazaqstandyq JOO órtten zardap shekken otbasylardyń stýdentterine granttar men jataqhanadan oryn berýge daıyn. Al aqyly negizde oqıtyn stýdentter men magıstranttardy grantqa aýystyrý kózdelgen.