Qazaqstannyń epıdahýaly nashar. Eldiń bir oblysy «sary» beldeýde, qalǵan óńirdiń barlyǵy «qyzyl» aımaqta ornalasqan. Soǵan qaramastan, bilim sapasyna alańdaýshylyq tanytqan Úkimet vaksına qarqynyn arttyryp, oqýshylardy dástúrli formatta oqytýǵa sheshim qabyldady.
Dúnıe júziniń basqa memleketterindegi kovıdtik ahýal qandaı deńgeıde ekenine Almaty-akshamy.kz tilshisi ǵalamtor materıaldary arqyly sholý jasaıdy.
«Habar 24» saıtynyń habarlaýynsha, Beıjińde oqý jyly qyrkúıektiń birinde bastalady. Biraq balalar men ustazdarǵa topqa jınalýǵa, buqaralyq sharalarǵa qatysýǵa jáne COVID-19 derti anyqtalǵan aýdandarǵa barýǵa tyıym salyndy. Qazir eldegi 227 aýdanda lokdaýn tártibi engizilgen. Qytaıdan tys júrgen muǵalimder, stýdentter jáne bala baqsha qyzmetkerleri Beıjińge oralyp, 14 kún baqylaýda bolǵannan keıin mektepke bara alady. Qoldarynda merzimi eki kúnnen aspaıtyn PTR-test qorytyndysy bolýy kerek.
«Kabardyń» málimetinshe, Qyrǵyzstannyń bilim berý uıymdarynda jańa oqý jyly 15 qyrkúıekten bastalady. Qyrǵyzstan mınıstrler kabınetiniń baspasóz qyzmeti málim etkendeı, oqý jylynyń bastalýyn 15 kúnge aýystyrý týraly sheshim eldegi epıdemıologıalyq jaǵdaıǵa sáıkes, dástúrli oqytý nysanyna kezeń-kezeńimen kóshý maqsatynda qabyldandy. Óz kezeginde, Qyrǵyzstan Respýblıkasy Bilim jáne ǵylym mınıstrligi oqý prosesin dástúrli formatta qaıta bastaý kezinde qoǵamdyq densaýlyq saqtaý máseleleri, osyndaı formattyń artyqshylyqtary men qaýip-qaterleri jáne basqa da faktorlar nazarǵa alynýy tıis ekenin atap ótti.
COVID-19 taralýyna jol bermeý jónindegi VAK-tyń aqparatyna sáıkes, Izraıl úkimeti COVID-19 epıdemıologıalyq jaǵdaıyna baılanysty jańa shekteýlerge ruqsat berdi. 18 tamyzdan bastap ekonomıkanyń barlyq sektorlaryna taralatyn «jasyl standart» rejımi engiziledi. Bul buqaralyq is-sharalarǵa kirer kezde vaksınasıa jasalǵany nemese COVID-19 vırýsynan aıyqqandyǵy týraly sertıfıkat- «jasyl tólqujatty» ne bolmasa vırýstyń joq ekendigin dáleldeıtin test nátıjesin kórsetý qajettigin qamtıdy.
Argentınada koronavırýstyq ınfeksıa boıynsha aýrýshańdyq kórsetkishi artty. Elde táýligine 11 397 vırýs juqtyrý jaǵdaılary tirkeldi. Nátıjesinde KVI faktileriniń jalpy sany 5 052 884-ke jetti. Kóz jumý derekteri - 108 388. Halyqty vaksınalaý úshin reseılik vaksınamen qatar vırýsqa qarsy ekpeniń taǵy birneshe túri qoldanylady. Argentınada azamattar «Spýtnık V» jáne «AstraZeneca» nemese «Moderna» vaksınalaryn biriktirip, qoldana alady.
Shvesıada anyqtalǵan koronavırýstyq ınfeksıalar sany 1 108 057-ni qurady. Bir táýlik ishinde COVID-19 juqtyrýdyń 1 236 jaǵdaıy anyqtaldy. Infeksıanyń aýyr túrimen aýyratyn 29 pasıent reanımasıa bólimshelerinde em qabyldaýda. Jalpy alǵanda, SARS-CoV-2-den 14 658 adam qaıtys boldy. Bul rette, elimizde ımmýndaý qarqyndy júrip jatyr, COVID-19 vaksınasynyń birinshi dozasyn 6 584 455 adam, ekinshisin — 4 641 169 adam aldy.
Memlekettik qyzmetshiler halyqqa vaksına alýdy nasıhattaýdyń úlgisi retinde. Kenıa vaksınalaýdan jaltarǵan sheneýnikterdi jazalaýǵa nıetti. Resmı Naırobı barlyq memlekettik qyzmetshilerge COVID-19 vaksınasıasynan ótýdi tapsyrdy. Bas tartqan úkimettegi antıvakserler bul talapty oryndamaǵany úshin sógis alady. «Barlyq memlekettik qyzmetshilerge vaksınalanýǵa basymdyq beriledi. Al 23 tamyzǵa deıin ekpe alýǵa úlgermegenderge tártiptik sharalar qoldanylatyn bolady», — dep málimdedi Memlekettik qyzmet basshysy Djozef Kınúa.